Fyrrum þingflokksformaður Framsóknar segir Sigmund „hrokagikk valdsins“

Kristinn H. Gunnarsson, fyrrum alþingismaður fyrir Framsóknarflokkinn og formaður þingflokksins, segir Sigmund Davíð Gunnlaugsson forsætisráðherra og samflokksmann sinn vera í fullkominni afneitun á þeim veruleika sem almenningur í landinu er að mótmæla og forsætisráðherra á mikinn þátt í búa til. Þá segir hann forsætisráðherra og aðra meðlimi ríkisstjórnarinnar þjást af skynjunarofi -  „í hátimbruðum valdastólum sínum sem eru fluttir inn í sinn Babýlonsturn.”

Kristinn, sem stundum er nefndur Kiddi sleggja, lætur ummælin falla í pistli á heimasíðu sinni þar sem hann gerir mótmælin sem viðhöfð voru við hátíðahöldin 17 júní að umfjöllunarefni sínu.

Á þriðja þúsund manns mótmæltu þar hástöfum undir hátíðarræðu forsætisráðherra eins og frægt er orðið og segir Kristinn að málflutningur Sigmundar á þjóðhátíðardeginum hafi verið „afar óskynsamur.“ Forsætisráðherrann hafi látið eins og honum væri alls hendist ókunnugt um ólguna í samfélaginu og undirrót þeirrar reiði sem braust fram á Austurvelli.

„Það þarf mikið til þess að prúðasti almenningur í Evrópu grípi til hávaðasamra mótmæla á sjálfan þjóðhátíðardaginn við athöfn sem annars er landsmönnum kær helgistund. Þegar svo er komið er ekki allt í lagi og ráðamenn þjóðarinnar komnir úr sambandi við fjölmenna hópa þjóðfélagsins,” segir Kristinn og bætir við að dagljóst sé að mótmælin eiga mikinn stuðning meðal landsmanna. 

Forsætisráðherra í fullkominni afneitun

Þingflokksformaðurinn fyrrverandi sakar Sigmund Davíð um að ala á sundrungu í samfélaginu og að hafa tamið sér „stóryrði og hnýfilyrði í garð þeirra sem ekki deila hans sýn á menn og málefni.”

„Sigmundur Davíð Gunnlaugsson og ríkisstjórn hans hefur á undanförnum mánuðum egnt fjölmarga þjóðfélagshópa til reiði og hellt olíu svo á þann eld með hrokafullum ummælum,“ segir Kristinn og vísar til ummæla forsætisráðherrans um hið litla fylgi ríkisstjórnarinnar gæti „að einhverju leyti skýrist kannski á þessu rofi milli raunveruleika og skynjunar eða umfjöllunar,” sem Sigmundur lét hafa eftir sér í samtali við Eyjuna.

„Ræða forsætisráðherrans á Austurvelli fyrir fáum dögum er kannski skýrasta dæmið um rof milli skynjunar og veruleika sem er til staðar. Það er forsætisráðherrann sjálfur sem er í fullkominni afneitun á þeim veruleika sem almenningur er að mótmæla og Sigmundur Davíð Gunnlaugsson á mikinn þátt í að hafa búið til. Það er ekki almenningur sem þjáist af skynjunarrofinu heldur eru það ráðamennirnir við ríkisstjórnarborðið í hátimbruðum valdastólum sínum sem eru fluttir inn í sinn Babýlonsturn,” segir Kristinn.

“Undir kraumar reiði öryrkja og eldri borgara yfir kjörum sínum og almenn reiði vegna þjónkunar við fámennan hóp auðmanna með lækkun skatta og fyrirhugaðri gjöf á verðmætum makrílstofni. Það er margt sem skýrir mótmælin við Austurvöll og flest af því er ríkisstjórnin meira og minna ábyrgt fyrir. Það er mikið rof á skynjun forsætisráðherra að

sjá það ekki.”