Upplýsingabyltingin fór fram hjá höfundi Reykjavíkurbréfsins

Morgunblaðið ræðst að Ríkisútvarpinu í nýjasta Reykjavíkurbréfi og sakar stofnunina um að hafa leikið stórt hlutverk í Búsáhaldabyltingunni. Birgitta Jónsdóttir kapteinn Pírata segir sorglegt að ritstjóri elsta dagblaðs landsins skilji ekki fjölmiðla. 

Í Reykjavíkurbréfinu segir að þáttur Ríkisútvarpsins í Búsáhaldabyltingunni hafi verið að útvarpa skilaboðum mótmælenda um hvar tilteknir embættismenn byggju með fjölskyldum sínum og hvatningum ónafngeindra forsvarsmanna mótmælanna.

Markmið byltingarinnar hafi verið að eyðileggja vinnufrið á Alþingi og að reyna að yfirtaka þingið með valdi ef annað dygði ekki til, Þinghúsið hafi þannig verið grýtt, með eggjum, grjóti og saur.

Birgitta Jónsdóttir, kafteinn Pírata, segir að upplýsingabyltingin hafi greinilega farið framhjá höfundi Reykjavíkurbréfsins. Hann búi greinilega í gamla tímanum þegar valdhafar gátu stjórnað umræðunni. Aðgangur almennings að upplýsingum sé öflugasta tækið sem við eigum.

Segjast bara hafa skrifað eina litla frétt á vefinn.

Höfundur Reykjavíkurbréfsins telur að mótmælendur séu að ná vopnum sínum og minnist þar sérstaklega á mótmæli sem fóru fram gegn ríkisstjórninni á 17. júní.

Hann segir ömurlegt að hópur fólks taki sér rétt til að eyðileggja slíka stund fyrir þjóðinni. Og sérlega dapurlegt sé að eina stofnun landsins, sem Alþingi segir að starfi í þjóðarþágu, Ríkisútvarpið, skuli hafa látið eftir sér að þjónusta þennan hóp sérstaklega. 

Það merkilega er hinsvegar að starfsmenn Ríkisútvarpsins kannast bara við að hafa skrifað eina frétt um mótmælin og hana fremur sakleysislega.

Birgitta segir að á undanförnum árum hafi oft verið reynt að grafa undan fréttamönnum sem reyni að fjalla um málin. Hún segir það varla svaravert þegar því sé haldið fram að RÚV eða aðrir fjölmiðlar stjórni því hvort fólk nýti rétt sinn til að tjá sig um það sem því finnst miður fara.

Frétt Stöðvar 2 um málið má sjá í spilaranum hér að ofan.