Of karllæg menning innan lögreglunnar

Kona sem innanríkisráðuneytið braut á við skipun í starf aðstoðaryfirlögregluþjóns segir menninguna innan lögreglunnar vera of karllæga og hún útilokar ekki skaðabótamál gegn ríkinu. Innanríkisráðherra segir koma til greina að breyta reglugerð til að koma í veg fyrir að málið endurtaki sig.

Gná Guðjónsdóttir, fyrrverandi lögreglufulltrúi, starfaði sem lögreglukona í fjórtán ár áður en hún hélt utan til að starfa sem yfirmaður í lögreglu Sameinuðu þjóðanna. Í febrúar í fyrra sótti hún um stöðu aðstoðaryfirlögregluþjóns hjá lögreglunni á höfuðborgarsvæðinu. Var hún boðuð í viðtal en komst á endanum ekki í tíu manna úrtak.

Þrír karlmenn voru skipaðir í stöðurnar en Gná óskaði í kjölfarið eftir rökstuðningi og málsgögnum. Kærði hún málið til kærunefndar jafnréttismála.

Kærunefndin komst að þeirri niðurstöðu að sú mælistika sem notuð var við stigagjöf í ráðningarferlinu hefði gefið karlkyns umsækjendum forgjöf. Þannig var starfsreynsla Gnáar, bæði hér heima og erlendis, að engu metin. Þá skoraði hún fullt hús stiga í tungumálakunnáttu en sá liður í ráðningarferlinu var látinn falla niður þegar niðurstöður voru teknar saman. Raunar mat hæfisnefndin það sem svo að að minnsta kosti fimm spurningar af þeim sjö sem beint var til umsækjanda hefðu verið háðar annmörkum.

Þá segir í úrskurði nefndarinnar: „Þykir kærði ekki hafa sýnt fram á að aðrar ástæður en kynferði hennar hafi legið þar til grundvallar.“

Gná hefur ekki tekið ákvörðun um hvort hún fari fram á skaðabætur frá íslenska ríkinu en útilokar það ekki. Hún segir menninguna innan lögreglunnar vera of karllæga og því komist konur ekki í stjórnunarstörf. Þessu þurfi að breyta.

„Mig langar bara að setja þetta í samhengi við þennan dag sem er nú nýliðinn, 19. júní, þegar konur fengu kosningarétt,“ segir Gná. „Það má eiginlega segja að konur í lögreglunni hafi ekki kosningarétt á meðan þær hafa ekki tækifæri til að sitja í yfirstjórn og fá að taka þátt í að móta bæði innri og ytri stefnu lögreglunnar.“

Ólöf Nordal innanríkisráðherra segir að ráðuneytið muni nú taka til skoðunar reglugerð þar sem kveðið er á um störf hæfisnefndarinnar.

Kallar þetta á einhverjar aðgerðir af hálfu ráðuneytisins?

„Ég gæti alveg ímyndað mér að við munum breyta þessari reglugerð en ég vil ekki úttala mig um það fyrr en ég er kominn með það í hendurnar,” segir Ólöf.

Hanna Birna Kristjánsdóttir var innanríkisráðherra þegar ákvörðunin var tekin en Ólöf segir hana hafa tekið rétta ákvörðun miðað við fyrirliggjandi gögn.

„Hæfisnefndin kom með sínar tillögur, þar voru karlmenn metnir hæfastir. Ráðherra gerir þá það sem að honum ber, velur þá til starfsins.“