Bíó Paradís hefur fimm stundir til að safna 700 þúsund krónum

Söfnun kvikmyndahússins Bíó Paradís fyrir bættu hjólastólaaðgengi lýkur á miðnætti. Það eru því um það bil fimm tímar til stefnu en enn á eftir að safna fyrir tæplega fimmtán prósent þeirrar upphæðar sem lagt var upp með.

Lágmarksupphæðin sem safna þarf er tæplega 4,5 milljón króna en rúmlega 3,8 milljónir hafa safnast nú þegar og því hafa fjölmargir lagt hönd á plóg. En betur má ef duga skal þar sem reglur Karolina Fund virka þannig að ef lágmarkið næst ekki, í þessu tilfelli 4,5 milljónir króna, þá fær Bíó Paradís ekki krónu.

Sjá einnig: Bíó Paradís selur árskort til tíu ára fyrir bættu aðgengi

Kvikmyndahúsið hefur verið gagnrýnt fyrir slæmt aðgengi fyrir fatlaða en aðgengi fyrir fólk í hjólastól er ábótavant í húsinu.

Guðjón Sigurðsson, formaður MND félagsins, komst ekki í útskrift dóttur sinnar úr Kvikmyndaskólanum sem haldin var í húsinu á dögunum þar sem hann komst ekki inn í salinn.

Sjá einnig: Komst ekki í útskrift dóttur sinnar útaf slæmu hjólastólaaðgengi

„Við höfum vitað það lengi að við þyrftum að gera eitthvað róttækt í þessu en vissum reyndar ekki að breytingarnar myndu kosta svona mikið,“ sagði Hrönn Sveinsdóttir, framkvæmdastjóri Bíó Paradísar, í samtali við Stöð 2 í vikunni. „Við vorum fyrstu árin að koma okkur upp almennilegum sýningarbúnaði og tryggja grundvöll bíósins. Núna þegar við erum búin að því, þá gerum við okkur auðvitað grein fyrir því að auðvitað þarf þetta bíó að vera fyrir alla.”

Hægt er að leggja söfnuninni lið hér. 

Uppfært 19.26: 

Nú vantar einungis tíu prósent til þess að kvikmyndahúsið nái lágmarksfjárhæð. 

Uppfært 20.07:

Nú hafa safnast 96 prósent af þeirri upphæð sem þarf til að söfnunin nái takmarkinu. 

Uppfært 20.59:

Takmarkinu hefur verið náð.