Endurskoðun laga um aðstoð við gjaldþrota heimili frestað

Endurskoðun á lögum um fjárhagsaðstoð við heimili sem neyðast til að fara í gjaldþrotaskipti mun ekki fara fram á þessu þingi en stefnt var að endurskoðun þeirra fyrir síðustu áramót. Um helmingur þeirra sem óskað hefur eftir aðstoðinni hefur verið hafnað

Í janúar í fyrra voru sett lög um fjárhagsaðstoð við skuldsett heimili sem neyðast til að óska eftir gjaldþrotaskiptum á búi sínu og nemur aðstoðin 250 þúsund krónum sem leggja þarf fram sem tryggingu þegar óskað er gjaldþrots.

Valgerður Bjarnadóttir sagði á Alþingi í dag um helming þeirra sem óskað hafi eftir þessari aðstoð hafa fengið synjun.  Því væri augljóst að lögin hafi ekki virkað enda hafi átt að endurskoða þau um síðustu áramót. Enn bólaði hins vegar ekkert á frumvarpi frá félagsmálaráðherra.

Eygló Harðardóttir félagsmálaráðherra boðar að frumvarp um þetta komi fram á haustþingi þar sem skilyrðum fyrir aðstoð verði breytt.

„Þá hef ég núna undirritað reglugerð sem heimilar stjórn Íbúðalánasjóði að afskrifa það sem stendur umfram virði eigna á þremur árum í stað fimm. Ég vona að fólk sem er í þeirri stöðu að hafa enn þá einhverja kröfu á sig skoði þann möguleika og óski eftir að sjóðurinn felli það niður,“ segir Eygló.

Þá sé komið til móts við þá sem búa í eigin eignum eftir að hafa misst þær á nauðungarsölu í nýju frumvarpi um húsnæðisbætur.

„Ég verð að segja það virðulegur forseti að mér finnst það bara lélegt að ráðherrann komi hér og segi að þetta verði á næstu þingmálaskrá. Það þýðir á þingmálaskránni sem lögð verður fram haustið 2015. Það stendur í þessum lögum að það eigi að endurskoða þau fyrir árslok 2014. Ég svo sem lýsi ekki yfir neinum vonbrigðum yfir því vegna þess að ég átti svo sem ekkert vona á að staðið yrði vel að þessum málum. En þetta er náttúrlega ákaflega lélegt hæstvirtur ráðherra,“ sagði Valgerður Bjarnadóttir.