Þúsund lítra olíutankurinn hársbreidd frá því að springa

Betur fór en á horfðist þegar eldur kom upp í flutningabíl Nesfrakt í gærkvöldi. Bíllinn var staddur skammt utan við Höfn í Hornafirði en hann var á leið frá Seyðisfirði til Reykjavíkur með fullan farm af plastgluggum úr Norrænu.

Að sögn Arnar Þórs Ólafssonar hjá Nesfrakt leikur grunur á að kviknað hafi í bílnum út frá sprungnu framdekki.

„Eldurinn kom úr dekkinu þegar bílnum var keyrt upp á spýtukubb til að hækka hann, svo að koma mætti tjakki undir,“ segir Arnar. „Það virðist hafa verið gífurlegur hiti innan í dekkinu, jafnvel eldur, sem við gátum ekki séð áður en við byrjum að færa bílinn og það var í raun ekkert sem gaf til kynna að hætta væri á ferðum.“

Arnar segir að þó að bíllinn hafi skíðlogað og sé nú óökufær hafi þó farið betur en á horfðist, engin slys hafi orðið á fólki. Vindáttin hafi verið hagstæð svo að farmurinn slapp óskaddaður. „Vagninn var fullur af plastgluggum og það hefði náttúrulega komið svaðalegt bál ef eldurinn hefði læst sig í þeim.“

Þá hafi þúsund lítra olíutankur bílsins, sem var svo gott sem fullur, verið orðinn mjög heitur áður en slökkviliðið á Höfn náði að ráð niðurlögum eldsins. „Slökkviliðsmennirnir sögðu að eldurinn hefði fært sig aðeins aftur hefðu þeir ekki ráðið neitt við neitt. Eldur í þúsund lítra tanki er ekkert grín,“ segir Arnar.