Sigmundur Davíð um hjúkrunarfræðinga árið 2012: „Þetta er ótæk staða“

„Grunndagvinnulaun nýútskrifaðs hjúkrunarfræðings á Landsspítalanum eru nú 280 þúsund. Það er viðurkennd staðreynd að álag á hjúkrunarfræðinga og aðra opinbera starfsmenn hefur stóraukist undanfarin ár. Það er sanngjörn krafa að stofnanasamningar hjúkrunarfræðinga verði endurnýjaðir eins og mælt er fyrir um í kjarasamningum þeirra. Niðurskurður í heilbrigðiskerfinu má ekki verða til þess að við missum fleira hæft fólk úr þessum mikilvægu störfum.“ Þetta sagði Sigmundur Davíð Gunnlaugsson, forsætisráðherra, í grein á vefsíðu sinni 21. nóvember árið 2012. Grein hét „Sanngjörn krafa hjúkrunarfræðinga“ og hana má lesa í heild sinni hér.

Það ár kröfðust hjúkrunarfræðingar kjarabóta en stofnanasamningar þeirra við Landspítalann höfðu þá verið lausir í rúmlega ár. Kjaradeilur þeirra náðu nýjum hæðum þegar fréttir bárust þess efnis að ákveðið hefði verið að hækka laun forstjóra Landspítala um 25 prósent eða 450 þúsund krónur.

Sigmundur Davíð kallaði stöðuna þá grafalvarlega. „Hjúkrunarfræðingum er gefin sú skýring að vegna fjárskorts stofnana og LSH sé ekki hægt að endurnýja stofnanasamninga,“ sagði Sigmundur í grein sinni.

„Þetta er ótæk staða. Ljóst er að sá niðurskurður sem heilbrigðisstofnanir á öllu landinu hafa þurft að þola undanfarin ár er hluti af þessum vanda. Við afgreiðslu fjárlaga fyrir næsta ár er mjög mikilvægt tekið verði tillit til þessa vanda og heilbrigðisstofnunum verði tryggt fjármagn til að endurnýja stofnanasamninga,“ sagði hann. Þá benti hann á að ef fer sem horfir stefni í mikla manneklu og að hætt sé við að fjöldi hjúkrunarfræðinga segi upp og leiti betri kjara annars staðar. Þegar starfi margir í Noregi.

Í desember það ár sögðu 300 hjúkrunarfræðingar starfi sínu lausu vegna þess hve illa gekk að semja.

Samningaviðræður hjúkrunarfræðinga við ríkið nú í ár hafa siglt í strand en hjúkrunarfræðingar fóru í verkfall nú í lok maí. Ríkisstjórnin samþykkti á fundi sínum í gær að skipa sérstaka sáttanefnd í deilunni en lítið hefur reynt á heimild fyrir slíkri nefnd í lögum.