Innlent

Ísland í 5. sæti í Mr. Gay World: Sagðist ætla að afnema blóðgjafarbann og fólk reis úr sætum

Nanna Elísa Jakobsdóttir skrifar
Troy var ákaflega spenntur og stressaður þegar hann beið eftir úrslitunum. Hann stendur í miðjunni ásamt þeim þátttakendum sem komust í topp 5.
Troy var ákaflega spenntur og stressaður þegar hann beið eftir úrslitunum. Hann stendur í miðjunni ásamt þeim þátttakendum sem komust í topp 5. Mynd/Troy

„Þetta er mikilvæg keppni og mér finnst Íslendingar þurfa að veita henni frekari athygli því það sem hún gerir er að finna fólk í hverju landi sem getur sameinað samfélagið í að berjast fyrir þeim málstað sem það telur mikilvægan,“ segir Troy Michael Jónsson en hann varð í 5. sæti í Mr. Gay World eða Herra Heimur samkynhneigðra.

Þetta er besti árangur sem Ísland hefur náð í sjö ára sögu keppninnar.

Málaði eldspúandi fjall 
„Ég er gríðarlega ánægður með árangurinn, auðvitað hefði ég viljað vinna en þegar ég kom fyrst þarna út og sá hvað allir voru hæfir þá hélt ég að ég yrði ekki einu sinni í Topp 10.“ Troy stóð sig vel í flestum keppnisgreinunum.

Hann varð í öðru sæti í listaverkahluta keppninnar en þar áttu þátttakendur að skapa listaverk sem áttu að sýna sögu réttinda samkynhneigðra í því landi þaðan sem þátttakandinn kom.

„Ég teiknaði eldfjall og inni í eldfjallinu skrifaði ég mikilvægar dagsetningar í sögu réttindabaráttu samkynhneigðra á Íslandi.“ Nefnir hann þar lögleiðingu hjónabands einstaklinga af sama kyni, árið sem Jóhanna Sigurðardóttir varð forsætisráðherra og þegar Jón Gnarr tók þátt í Gleðigöngunni. „Ég var ótrúlega hissa að hafa orðið í öðru sæti í þessari keppni, eiginlega alveg í sjokki, af því að það voru svo margir listrænir.“

Troy hitti afrísk born og sagði það hafa verið mikla upplifun. Mynd/Troy

„Ég veit að það er málstaðurinn sem skiptir máli“
Lið Troy sigraði í íþróttakeppninni, hann varð í efstu þremur sætunum í prófi þar sem svara átti spurningum um réttindi samkynhneigðra í sögunni og varð einnig einn af efstu þremur í keppninni í viðhafnarklæðnaði. Hann sigraði með svari sínu við spurningum sem spurðar eru keppendur annars vegar í topp 10 og hinsvegar í topp 5.

„Spurningin fyrir topp 5 þátttakendurna var um hvað ég myndi vilja gera ef ég myndi sigra keppnina. Ég talaði um málstaðinn minn og baráttu fyrir því að samkynhneigðir menn megi gefa blóð á Íslandi. Það er gaman að segja frá því að allur salurinn stóð upp og klappaði og kynnirinn þurfti að gera hlé á keppninni. Hún sagði með tárin í augunum að svarið mitt hefði snortið hana af því að hún þekkti manneskju sem lést vegna þess að hún fékk ekki blóðgjöf þegar hana þurfti.“


Top 5 in the World.. HELL YES!!!!!! I got 4th runner up at Mr. Gay World! Tears of joy. I love you all so much and thank...

Posted by Troy Michael on Saturday, May 2, 2015

Hans stærsta afrek var þó að sigra viðtalshluta keppninnar. „Þá geturðu deilt með dómurunum fyrir hvað þú stendur og hvað þig langar að gera.“ Troy varð himinlifandi þegar tilkynnt var um sigurvegara í þeim hluta keppninnar. „Þá leið mér eins og ég hefði áorkað einhverju því ég veit að það er málstaðurinn sem skiptir máli.“ 

Það sem Troy telur að hafi dregið hann niður á stigatöflunni var slakur árangur í sundfatakeppninni. „Ég lít alveg ágætlega út en mennirnir þarna úti voru bara í svo fáránlega góðu formi,“ útskýrir hann.

Troy hefur fengið hina ýmsu framámenn og konur í stjórnmálum í lið með sér. Mynd/Troy

Ætlar að breyta lögum um blóðgjöf
Troy hefur barist fyrir því að banninu sem ríkir gegn því að samkynhneigðir gefi blóð verði aflétt. Hann segist hvergi nærri hættur þrátt fyrir að hann hafi ekki sigrað þessa keppni. „Ég get lofað þér því að ég mun fá þessum lögum breytt,“ segir Troy og leggur mikla vigt í orð sín. Hann hefur þegar hitt forsetann og segist hafa fengið hann í lið með sér.

Þjóðverjinn, Klaus Burkart, sigraði keppnina. Samkynhneigðir menn frá tuttugu og einu landi tóku þátt í keppninni sem tók fjóra daga.

„Þessi keppni er ekki fegurðarsamkeppni. Það er verið að leita eftir einstaklingum sem geta talað fyrir réttindum samkynhneigðra, kennt ungmennum og fengið alla í sama lið. Það var ástæðan fyrir því að ég tók þátt í þessari keppni.“

I'm nowhere near perfect. I enjoy the fact that I have flaws because I'm constantly pushing myself to be better.. I want...

Posted by Troy Michael on Saturday, April 25, 2015

Tengdar fréttir



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.