Sameiginleg útskriftarathöfn diplómanema: „Ég er rosalega stolt“

„Ég er rosalega stolt,“ segir Steinunn Ása Þorvaldsdóttir, fyrrum nemendi í starfstengdu diplómanámi fyrir fólk með þroskahömlun við Háskóla Íslands en nú hefur verið ákveðið að halda sameiginlega athöfn fyrir alla diplómanema á Menntavísindasviði.

„Þetta er besta niðurstaðan sem við gátum komist að,“ segir Steinunn sem barðist ötullega að því fyrir tveimur árum fyrir því að útskriftarárgangur sinn fengi að sækja útskriftarathöfnina í Laugardalshöll. Háskóli Íslands taldi það ekki möguleika þar sem að á grundvelli jafnréttissjónarmiða yrðu þá allir þeir sem útskrifast með gráðu úr diplómanámi að fá að vera viðstaddir athöfnina. Það eru fleiri hundruð einstaklingar. Diplómanemar í starfstengdu námi fyrir fólk með þroskahömlun bentu aftur á móti á að þau hafa ekki færi á að sækja sér æðri menntagráðu og því gilda ekki sömu sjónarmið um þau og aðra diplómanema. Þau eru aðeins 12 talsins og tekin inn á öðru hverju ári.

Sjá einnig: „Háskólinn tekur ekki tillit til fatlaðra“ 

„Það er mikilvægt að við nemendurnir fáum að útskrifast og vera viðurkennd líka. Þetta er eina gráðan sem við höfum,“ útskýrir Steinunn Ása. Hún segist telja þetta lokaniðurstöðu í tveggja ára baráttu sinni í málinu og er ánægð með þetta. „Þetta er samt eitthvað sem hefði átt að skoða fyrr líka. En mér líður allavega betur með þetta svona. Það er ekki hægt að rökræða þetta endalaust.“ 



Útskriftarathöfn diplómanema frá Menntavísindasviði verður 21. júní í Stakkahlíð, daginn eftir sumarbrautskráningu háskólans. „Já Menntavísindasvið hefur ákveðið að halda útskriftarveislu fyrir alla diplómanema,“ staðfestir Lilja Össurardóttir, aðjúnkt í þroskaþjálfafræðum og upplýsingafulltrúi fyrir hið starfstengda nám diplómanema með þroskahömlun. „Okkur fannst þetta rosalega góð lausn.“ Hún bendir á að sjónarmið beggja aðila í málinu séu skiljanleg og því sé þetta ánægjuleg niðurstaða eftir að málið virtist vera stál í stál. „Það hefur alltaf verið athöfn fyrir nemendur sem útskrifast úr starfstengdu diplómanámi fyrir þroskahamlaða. Sviðsforseti hefur komið og veitt þeim sín útskriftargögn og haldið ræðu. Rektor kom einnig í fyrra. En núna verður útskriftin stærri og meiri,“ segir Lilja.