Enn haldið sofandi í öndunarvél

Líðan annars drengsins sem var bjargað úr Læknum í Hafnarfirði í gær er óbreytt samkvæmt upplýsingum frá Landspítalanum. Honum er haldið sofandi í öndunarvél.

Hinn drengurinn, sem komst til meðvitundar á vettvangi í gær, er á gjörgæslu og á batavegi. Gert er ráð fyrir því að hann verði útskrifaður af gjörgæslu síðar í dag.

Lögreglunni á höfuðborgarsvæðinu barst tilkynning um klukkan hálf þrjú í gær um að tveir drengir væru hætt komnir við Reykjadalsstíflu í Læknum í Hafnarfirði. Drengirnir sem eru á grunnskólaaldri höfðu fest sig í litlum fossi við stíflu. Karlmaður um þrítugt reyndi að koma þeim til bjargar en lenti sjálfur í vanda í fossinum.

Aðstæður á slysstað voru mjög erfiðar. Mikill kraftur var í fossinum og áttu lögreglumenn erfitt með að athafna sig. Í tilkynningu frá lögreglunni kom fram að björgunaraðgerðir hafi gengið erfiðlega. Báðir drengirnir og maðurinn sem reyndi að koma þeim til aðstoðar voru fluttir á slysadeild.

Lögreglan í Hafnarfirði rannsakar nú tildrög slyssins.