Fór í afneitun þegar sonurinn greindist með einhverfu

Móðir tveggja einhverfra drengja segist hafa farið í mikla afneitun þegar eldri sonur hennar greindist með einhverfu. Ranghugmyndir hafi gert það að verkum að hún átti bágt með að trúa því að glaðlyndi sonur hennar væri einhverfur. Hún hvetur til upplýstrar umræðu á degi einhverfra sem er í dag.

Bræðurnir Jón Ágúst og Viktor Ingi eru fimm og átta ára en þeir eru báðir með dæmigerða einhverfu. Árið 2010 fluttu þeir með foreldrum sínum til Danmerkur. Jón Ágúst var þá þriggja og hálfs árs. Fjórum mánuðum eftir að þau komuna þangað bentu leikskólakennarnir foreldrum hans á að hann væri varla farinn að segja stakt orð á dönsku.

„Okkur var ráðlagt að fá hérna svona sérfræðinga til að kíkja á hann og við bara jú endilega en síðan þegar að greiningin kom að hann væri með dæmigerða einhverfu, á einhverfurófi, þá í raun og veru var það gríðarlegt áfall fyrir okkur. Við í raun og veru bara fórum strax í mikla afneitun“, segir Ragnhildur Ágústsdóttir.

Hún segir þau hjónin ekki hafa trúað því að hann væri einhverfur þar sem hann passaði ekki við þá ímynd sem þau höfðu af einhverfum.

„Hann gæti ekki verið einhverfur af því að hann væri svo mikil kelirófa og væri svo glaður. Við vorum með einhverjar mjög svona miklar ranghugmyndir í raun og veru hvað einhverfa væri, “ segir Ragnhildur.

Ragnhildur segir fyrstu viðbrögðin hafa verið þau að ætla að afsanna að Jón Ágúst væri einhverfur. „ Þegar við förum síðan og lesum okkur til bara á netinu og svona þá í raun og veru bregður okkur svolítið í brún af því að ekki aðeins var verið að lýsa eldri stráknum okkar heldur var bara hvað eftir annað koma atriði þarna sem að lýstu yngri guttanum okkar alveg í hnotskurn. Þannig að þarna í raun og veru áttuðum við okkur á því að þeir eru báðir einhverfir, “ segir Ragnhildur.

Hún segir drengina sína mjög ólíka og hafa kennt sér margt líkt og umburðarlyndi. Styrktarfélag barna með einhverfu stendur nú í annað sinn fyrir styrktar- og vitundarátakinu Blár apríl. Ragnhildur segir mikilvægt að upplýst umræða fari fram um einhverfu. Föstudaginn 10. apríl eru landsmenn meðal annars hvattir til að klæðast bláu til að vekja athygli á málefnum einhverfra.

„Það eru held ég miklu fleiri sem að hafa einhverja beina snertingu við einhverfu heldur en kannski margir halda og mjög víða og örugglega á flestum vinnustöðum einhver eða einhverjir sem að tengjast einhverjum með beinum eða óbeinum hætti, “ segir Ragnhildur Ágústsdóttir.