Guðrún Ágústa nýr framkvæmdastjóri ASÍ

Guðrún Ágústa Guðmundsdóttir hefur verið ráðin nýr framkvæmdastjóri ASÍ. Hún mun hefja störf þann 1. maí næstkomandi.

Guðrún Ágústa varð bæjarstjóri Hafnarfjarðar í júní 2012 og gegndi því embætti til júní 2014.

Í tilkynningu frá ASÍ segir að Guðrún Ágsústa hafi verið verkefnisstjóri stefnumótunar hjá Strætó bs. síðan í október 2014. „Guðrún Ágústa hefur gegnt ýmsum trúnaðarstörfum í stjórnum og ráðum á vegum Hafnarfjarðarbæjar. Hún lætur af öllum embættum á hinum pólitíska vettvangi áður en hún kemur til starfa hjá ASÍ.“

Guðrún Ágústa er með BA gráðu bókmennta- og fjölmiðlafræði og var kennari við Flensborgarskóla í fjölda ára auk þess að sitja í bæjarstjórn Hafnarfjarðar fyrir Vinstri græna frá 2006.