Innlent

Rétt að skoða forvirkar rannsóknarheimildir

Höskuldur Kári Schram skrifar
Ólöf Nordal innanríkisráðherra
Ólöf Nordal innanríkisráðherra
Ólöf Nordal innanríkisráðherra telur rétt að skoða hvort veita eigi lögreglunni forvirkar rannsóknarheimildir til að koma í veg fyrir að alþjóðleg glæpa- og hryðjuverkasamtök nái fótfestu hér á landi.

Ólöf var ræðumaður á hádegisfundi Varðbergs, samtaka um vestræna samvinnu og alþjóðamál í fyrirlestrarsal Þjóðminjasafnins í dag. Þar ræddi ráðherra löggæslu - og öryggismál meðal annars í ljósi hryðjuverkaárásanna í Frakklandi í síðasta mánuði.

Ólöf sagðir að lögregluyfirvöld hér á landi nytu góðs af alþjóðlegu samstarfi þegar kemur að baráttunni gegn skipulagðri glæpastarfsemi og hryðjuverkum. Svigrúm íslensku lögreglunnar til að rannsaka slík mál sé hins vegar takmarkað þar sem hún hefur ekki forvirkar rannsóknarhemildir.

„Við erum ekki með sambærilegar heimildir á við önnur Schengen-ríki. Við erum í Schengen-samstarfinu en við höfum ekki þessar heimildir til þess að vera sambærileg þeim þjóðum. Við þurfum að meta það hvort við teljum að það sé í lagi að þær séu ekki til staðar og hvort það sé nauðsynlegt fyrir okkur að hafa þær. Það er það mat sem þarf að fara í og ég vil ekki segja af eða á um það núna hvort er rétt,“ segir Ólöf.

Með forvirkum rannsóknarheimildum fær lögregla rýmri heimild til að rannsaka hugsanlegt eða ætlað brot í þeim tilgangi að koma í veg fyrir það.

„Við höfum verið að skoða á undanförnum árum hvort lögreglan þurfi frekari heimildir. Þær hafa verið kallaðar forvirkar rannsóknarhemildir. Fyrir töluvert mörgum árum þá hófst sú umræða hér en hún hefur svolítið legið í láðinni. Ég tek enga afstöðu til þess núna en ég held að það sé rétt miðað við þær aðstæður sem eru í heiminum í dag að við að minnsta kosti förum yfir það hvort að íslensk lögregla hafi þær heimildir sem hún þarf,“ segir Ólöf.




Fleiri fréttir

Sjá meira


×