Ríkið sýknað af kröfu olíufélaganna

Héraðsdómur Reykjavíkur hefur sýknað íslenska ríkið og Samkeppniseftirlitið af kröfu fyrrverandi eigenda olíufélaganna um að fella úr gildi úrskurð Samkeppniseftirlitsins í olíusamráðsmálinu svokallaða. Fréttastofa Ríkisútvarpsins greinir frá þessu á vef sínum.

Félögin eru Ker(Essó), Olís og Skeljungur.

Olíusamráðsmálið hófst 18. desember árið 2001 þegar lögreglan gerði húsleit í höfuðstöðvum Skeljungs, Olís og Essó ásamt starfsmönnum samkeppnisstofu og lögðu þar hald á gögn vegna rannsóknar á brotum gegn neytendum með víðtæku og ólögmætu samráði um verðlagningu.

Rannsókn málsins tók þrjú ár og tók til samráðs frá árinu 1993 til 2001. Þremur árum síðar sektaði Samkeppnisráð olíufélögum um samtals tvo milljarða og 525 milljónir króna en talið var að félögin hefðu hagnast um 6,5 milljarða króna á samráðinu. Olíufélögin vísuðu málinu til áfrýjunarnefndar samkeppnismála sem úrskurðaði að sektin skyldi lækkuð í einn og hálfan milljarð króna.

Í mars árið 2012 felldi Héraðsdómur Reykjavíkur úr gildi ákvörðun áfrýjunarnefndar samkeppnismála og var íslenska ríkinu gert að greiða olíufélögunum sektina upp á einn og hálfan milljarð króna til baka. Lá fyrir að olíufélögin hefðu haft með sér ólöglegt samráð en ekki hefði verið hægt að sakfella eða sekta þau þar sem málið hefði bæði verið rannsakað af lögreglu og samkeppnisyfirvöldum. Málinu var áfrýjað til Hæstaréttar sem vísaði málinu aftur í hérað og féll dómur í málinu í dag.