Óttast um líf sitt og fá neyðarhnapp

Lögreglan á Höfuðborgarsvæðinu hefur undanfarið útvegað þeim neyðarhnappa sem taldir eru í mögulegri lífshættu vegna heimilisofbeldis. Úrræðið er nýtt hér á landi og notað ásamt öðru í átaki gegn heimilisofbeldi. Fleiri muni fá slíkt öryggistæki á næstunni, segir Alda Björk Jóhannesdóttir, aðstoðaryfirlögreglustjóri Höfuðborgarsvæðsins.  



Fleiri munu án efa fá neyðarhnappa

Lögreglan á höfuðborgarsvæðinu hefur tveimur konum og þolendum heimilisofbeldis svokallaða neyðarhnappa. Þremur konum á Suðurnesjum hafa verið afhentir slíkir hnappar, hinni fyrstu í fyrrasumar. Fréttatíminn fjallar um málið í dag. 



Teljast í lífshættu

Alda Björk segir víst að fleiri muni fá neyðarhnappa en reynsla sé rétt að fást af úrræðinu. Sérútbúið hættumat er gert fyrir hvert tilfelli. „Við metum að mikil áhætta sé í þessum málum og öryggi viðkomandi sé ekki betur gætt heldur en með þessu úrræði. Við notum þetta ekki almennt. Við erum að tala um að viðkomandi geti verið í lífshættu", sagði Alda Björk í fréttum Stöðvar tvö í dag.

Þolandinn er með hnappinn á sér allan sólarhringinn og hægt er að staðsetja hann með GPS hvar sem er. Hnappurinn er tengdur við Öryggismiðstöðina og Neyðarlínuna og berast boðin til fjarskiptamiðstöðvar lögreglunnar. 



Fyrst og fremt öryggistilfinning

Alda Björk segist ekki vita til þess að tækið hafi beinlínis bjargað mannslífum. Það veiti konunum fyrst og fremst öryggistilfinningu. „Það er ekkert sérstaklega algent að það sé ýtt á hnappana þannig að viðkomandi noti hnappinn. Þetta veitir þolandanum meira öryggi til að vera þátttakandi í samfélaginu þegar hann er í þessari hættu", segir hún.

Lögreglan á Höfuðborgarsvæðinu hóf átak gegn heimilisofbeldi í byrjun árs og hafa meira en hundrað mál verið tilkynnt síðan þá. Reykjavíkurborg og Barnaverndarnefnd vinna með lögreglu í átakinu og Mosfellsbær varð nýlega þátttakandi í því. Ítarlegri skráning á heimilisofbeldi er hluti af þeirri vinnu.

„Alveg örugglega", segir Alda Björk aðspurð hvort það muni aukast að þolendur fái slíkt öryggistæki.  



Konur óttast um líf sitt

Mikil fylgni er á milli manndrápa og heimilisofbeldis. Gera má ráð fyrir að lágmark fimm konur óttist um líf sitt hér á landi vegna ofbeldis. Í úttekt Fréttatímans kemur fram að sakfellt hafi verið í sautján heimilisofbeldismálum frá árinu 2011 hjá Héraðsdómi Reykjaness, þar af átta í fyrra. Átak lögreglunnar hófst fyrr á Suðurnesjum eða árið 2013.