Hátt í fjörutíu stelpur skráðar til leiks í æfingabúðir Gettu betur

Æfingabúðir Gettu betur-stelpna fara fram í annað sinn um næstu helgi, þann 28.-30. ágúst. Að sögn Maríu Helgu Guðmundsdóttur, formanns Gettu betur-stelpna, er búist við að um 35 stúlkur taki þátt í búðunum í ár.

 

„Þetta er fyrir stelpur í efstu bekkjum grunnskóla, í 9. og 10. bekk, og svo fyrir stelpur í framhaldsskóla. Búðirnir hefjast á föstudagskvöld og standa yfir alla helgina,“ segir María Helga. Þátttakendur greiða 1500 króna staðfestingargjald í búðirnar en annars er mestallur kostnaður dekkaður með styrkjum.

„Við höfum lagt upp úr því að hafa þetta aðgengilegt fyrir alla og veitum til að mynda stelpum utan af landi ferðastyrk svo þær geti tekið þátt. Þær eru síðan í fullu fæði hérna hjá okkur og fá öll námsgögn og allt slíkt,“ segir María Helga.

Fræðsla og kynning á því hvernig Gettu betur gengur fyrir sig

Búðirnar fara fram í húsnæði Verzlunarskóla Íslands og í Útvarpshúsinu í Efstaleitinu. Aðspurð um hvernig námskeiðið er byggt upp segir María Helga:

„Þetta er svona sambaland af fræðslu og kynningu á því hvernig Gettu betur gengur fyrir sig. Hvernig það er að vera í liði, að komast í lið, hvernig Gettu betur-keppendur æfa og hvernig maður aflar sér upplýsinga. Svo tökum við líka á félagslega þættinum, við reynum að hrista hópinn saman, höfum spilakvöld og reynum að fá þær til að kynnast innbyrðis. Við reynum svona að veita þeim alhliða innsýn inn í það hvernig það er að taka þátt í spurningakeppni og hvað þetta getur verið skemmtilegt.“

Búðunum lýkur svo með æfingamóti þar sem stelpunum er skipt upp í lið og þær keppa í nokkurs konar mini-Gettu betur sem fer fram á Markúsartorgi í Útvarpshúsinu í settinu þar sem útvarpskeppnir Gettu betur fara fram.

Telur að kynjakvótinn hafi gefist vel

Kynjakvóti var í fyrsta sinn í Gettu betur í fyrra og þurfa nú bæði stelpur og strákar að vera í liðum Gettu betur. María Helga segir að hún viti um þrjár stelpur sem komu í æfingabúðirnar í fyrra sem fóru svo í Gettu betur-liðið í sínum skóla. Hún telur að það hafi gefist vel að taka upp kynjakvóta í keppninni.

„Það höfðu verið gerðar ýmsar tilraunir svona til þess að auka þátttöku og áhuga stelpna en það hafði bara ekki borið árangur. Það var ennþá þannig að 95% keppenda í sjónvarpi voru strákar, ár eftir ár eftir ár. Þegar maður horfir á keppnirnar sem voru í fyrra, þar sem var stelpa í hverju einasta liði, þá gefur það auga leið að þetta voru ekkert síðri keppnir og jafnvel skemmtilegri ef eitthvað er, þannig að ég held að þetta hafi bara sannað sig,“ segir María Helga.

Enn er hægt að skrá sig til leiks í æfingabúðirnar en skráning fer fram hér.