Hin eina sanna Adele

Í dag kom nýjasta plata söngkonunnar Adele, 25 út og er óhætt að segja að hennar hafi verið beðið með mikilli eftirvæntingu.

Söngkonan gaf síðast út plötu árið 2012 og sendi þann 23. október frá sér sitt fyrsta lag í þrjú ár. Viðbrögðin við útgáfu lagsins Hello lýsa kannski einna best þeirri gríðarlegu spennu sem myndaðist vegna útgáfu plötunnar og nýs efnis frá Adele en lagið bókstaflega braut internetið og var um lítið annað talað daginn sem það kom út. Sem dæmi má nefna að myndbandið sló áhorfsmet Vevo fyrir flest streymi á einum degi en laginu var streymt 27,7 milljón sinnum á einum degi og er þegar þetta er skrifað komið með 414.568.112 áhorf.

Sjá einnig: Hlustaðu á nýja lagið með Adele: Aðdáendurnir ærðust á Twitter

Upphaf ferilsins

Adele er fædd árið 1988 í norðurhluta London og er einkabarn Penny Adkins og Mark Evans. Söngkonan var að mestu alin upp af móður sinni en faðir hennar yfirgaf fjölskylduna þegar Adele var fjögurra ára. Hún fór snemma að syngja og sagði í viðtali við The Telegraph árið 2008 að Etta James og Ella Fitzgerald hefðu haft mikil áhrif á hana.

Adele skaust fram á sjónarsviðið árið 2006 eftir að hún gerði plötusamning við útgáfufyrirtækið XL Recordings í kjölfar þess að vinkona hennar póstaði myndbandi af henni að syngja stuttan lagbút á vefsíðuna Myspace. En söngkonan hafði stuttu áður útskrifast úr The BRIT School for Performing Arts and Technology en skólinn hefur útskrifað talsverðan fjölda þekktra tónlistarmanna, sem dæmi má nefna Amy Winehouse, Imogen Heap og Jessie J.

Adele hefur gefið út þrjár breiðskífur. Sú fyrsta kom út árið 2008 og ber nafnið 19 og hlaut góðar viðtökur, en nafnið er rakið til þess að hún var nítján ára þegar mestur hluti plötunnar var tekinn upp. Árið 2011 kom platan 21 út og hlaut gríðargóðar viðtökur og er ástæða nafngiftarinnar einnig sú að söngkonan var tuttugu og eins árs þegar sú plata var tekin upp. Í dag leit sú þriðja dagsins ljós og ber hún nafnið 25. 

Önnur breiðskífa Adele, 21, fjallaði að miklu leyti um erfið sambandsslit og hjartasár en söngkonan sagði í viðtali við kanadíska spjallþáttinn etalk að nýja platan fjallaði að miklu meira leyti um hana sjálfa og hvernig það væri að fullorðnast og sætta sig við hlutina.

Stressandi að snúa aftur

Á miðvikudaginn bárust fregnir um að plötunni hefði verið lekið á netið í heild sinni og sett fyrr í sölu í verslunum Target, en einn netverji birti mynd á Twitter af plötunni sem hann sagðist hafa komist yfir í versluninni og væri hann nú að gera upp við sig hvort hann ætti að leka henni á internetið. Verslunarkeðjan hefur þvertekið fyrir að platan sé þaðan og engin yfirlýsing hefur borist úr herbúðum söngkonunnar. 

Sjá einnig: Væntanlegri plötu Adele lekið á netið

Söngkonan sagði í viðtali við Graham Norton á BBC á dögunum að velgengni 21 hefði skelft sig örlítið. 21 seldist í 31 milljón eintaka og Adele vann til sex Grammy-verðlauna, tvennra Brit-verðlauna og þrenn American Music-verðlaun hlaut hún og er 21 fjórða mest selda plata Bretlands og hélt að auki toppsætinu í Bandaríkjunum lengur heldur en nokkur plata hefur gert frá árinu 1985, eða í alls 23 vikur.

Sjá einnig: Adele slær sölumet

Það þarf því ekki að undra að það hafi verið ögn kvíðvænlegt að ætla að fylgja þessu eftir og sagði hún við Norton að hún að hún hefði hugsað með sér að kannski hefði 21 fært henni sinn skerf að velgengni og það væri nóg. Hún hefði hins vegar fljótlega áttað sig á því að hún þyrfti meira og sjálfsagt eru margir ánægðir með að Adele hætti við að leggja míkrafóninn á hilluna og setjast í helgan stein.

Myndbandið við lagið Someone Like You sem finna má á plötunni 21 er með með mest áhorf á vefnum Youtube af öllum myndböndum sem söngkonan hefur sent frá sér en 574,039,633 hafa horft á myndbandið.