Undirbúa bara boðaðar aðgerðir

Samninganefnd félaga iðnaðarmanna og Samtök atvinnulífsins funda aftur á föstudag eftir árangurslítinn fund í gærmorgun.

Kristján Þórður Snæbjarnarson, formaður Rafiðnaðarsambandsins, segir samt mikið bera á milli þegar kemur að viðræðum um launalið samninganna.

„Og það er svo sem jákvætt að menn ætli að tala saman áfram. Við ætlum að reyna að skoða sérmál á milli funda, bara til að reyna að hafa eitthvað til að tala um,“ segir hann.

Staðan sem uppi sé gefi þó ekki miklar væntingar um að saman náist í viðræðunum.

„Ennþá eru bara í undirbúningi þær aðgerðir sem samþykkt hefur verið að ráðast í. Það er ekkert annað að gera. Til að breyta stöðunni þarf eitthvað nýtt að gerast.“