Ætlar að verða betri í golfi með aldrinum

„Það eru auðvitað mikil forréttindi að fá að eldast og það er verkefni hvers manns að halda sér ungum í anda, líkama og sál,“ segir Guðni Bergsson, lögfræðingur og fyrrverandi atvinnumaður í knattspyrnu. Hann stendur á miklum tímamótum í dag því hann fagnar fimmtugsafmæli sínu.

„Það verður eitthvert partí um helgina eins og gjarnan er á svona tímamótum. Maður verður að halda einhverja veislu til að fagna þessum áfanga, með sínu nánasta fólki. Dagurinn í dag verður þó í rólegheitunum. Ætli maður fái sér ekki huggulega máltíð í tilefni dagsins en gleðin þarf að bíða fram að helginni. Þessi þriðjudagspartí hafa alltaf verið frekar erfið,“ segir Guðni spurður út í hvort hann ætli að gera eitthvað í tilefni dagsins. Hann var staddur með fjölskyldu sinni í góðu yfirlæti í sumarbústað í Borgarfirðinum þegar blaðamaður náði tali af honum.

Um næstu helgi verður heljarinnar veisla í Valsheimilinu og er Guðni nú þegar byrjaður að blanda í salatið og kæla drykkina. „Jú, ég er búinn að plana þessa veislu, það verður músík og gleði. Logi Ólafsson verður veislustjóri og er undir mikilli pressu en hann er með skemmtilegri mönnum sem ég þekki. Annars snýst þetta bara um að hafa gaman og ég hugsa að stemningin verði góð í Valsheimilinu,“ útskýrir Guðni.

Hann hefur ávallt haldið sér í góðu formi, enda lítið annað í boði þegar menn eru í atvinnumennsku í knattspyrnu. „Maður er auðvitað meðvitaður um það að hugsa betur um sig þegar maður eldist og rækta líkamann og sálina enn frekar. En þessi aldur er bara tala og maður má ekki taka hana of alvarlega. Þetta er hálf óraunverulegt því manni finnst maður alltaf vera strákur enn þá. Það er mikilvægt að vera ungur í anda.“ Guðni lék knattspyrnu með liðum á borð við Tottenham Hotspur, Bolton Wanderers og Val enda uppalinn Valsari.

En þegar menn eru orðnir hálfrar aldar gamlir á blaði, setja menn sér önnur markmið? „Ég hef verið að reyna að takast enn frekar á við golfið en hef bara verið að fara svo sjaldan. Það hefur gengið afleitlega fyrir vikið. Núna er hugmundin að gefa golfinu meiri tíma. Ég er búinn að gefa félögunum forskot í golfinu en núna ætla ég að ná þeim. En annars ætlar maður bara að reyna að halda sínu striki og njóta lífsins með nánustu fjölskyldu og vinum,“ segir Guðni.