Hæstiréttur staðfestir gæsluvarðhald yfir grunuðum fjársvikurum

Hæstiréttur staðfesti í gær gæsluvarðhaldsúrskurð héraðsdóms yfir þremur erlendum karlmönnum sem grunaðir eru um að hafa nýtt sér íslensk kreditkortarnúmer til að kaupa ýmsan varning og þjónustu hér á landi. 

Sjá einnig: Grunaðir um að leigja íbúð í gegnum Airbnb með stolnu greiðslukorti

Lögreglan telur líklegt að um sé að ræða lið í skipulagðri brotastarfsemi sem teygi anga sína til fleiri landa. Fram kemur í dómi héraðsdóms, sem hæstiréttur staðfesti óbreyttan, að lögreglan þurfi að leita aðstoðar erlendra löggæslustofnanna og eftir atvikum greiðsluþjónustufyrirtækja til að upplýsa málið og til að hafa uppi á hugsanlegum samverkamönnum þremenninganna. 

Samkvæmt heimildum fréttastofu eru mennirnir frá Litháen en þeir eru sagðir hafa notað kortaupplýsingarnar til að kaupa sér flugfar hingað til lands, leigja sér íbúð í gegnum AirBnB leigumiðlunina auk þess að kaupa sér íslenskan varning. 

Húsleit var gerð í íbúðinni sem mennirnir dvöldu í síðastliðinn föstudag, þar sem þremenningarnir voru handteknir. Kannaðist enginn þeirra við varninginn sem þar fannst.