„Það munar um hvern rass“

Reynt verður að slá heimsmet Guinness í taubleyjuskiptingum á laugardaginn, hinn 26. apríl næstkomandi. Þetta er í annað sinn sem Ísland tekur þátt í keppninni, en á síðasta ári var skipt um taubleyjur á 8.301 barn á einum sólarhring, þar af voru 59 íslensk börn.

„Með þessu viljum við vekja athygli á taubleyjum. Taubleyjur eru fyrir umhverfisvænar, hagkvæmdar og góðar fyrir barnið,“ segir Helga Dögg Yngvadóttir, ein þriggja sem stendur fyrir viðburðinum.

Í gærkvöldi höfðu 37 skráð sig til þátttöku. Helga segir að á síðasta ári hafi verið ansi mjótt á munum. „Hefði Ísland ekki tekið þátt þá hefði metið ekki verið slegið. Það munar um hvern rass.“

Heimsmetabók Guinness setur reglur um að sá sem skiptir um bleyju þarf að vera eldri en 18 ára og má barnið ekki vera meira en einn meter á lengd. Þá má bleyjan sem notuð verður ekki vera heimagerð. Teknar verða myndir af þátttakendum fyrir og eftir atburðinn og verða vitni á svæðinu sem staðfesta að farið verði að settum reglum.

Viðburðurinn verður haldinn í Fjölskyldumiðstöð Lygnu í Síðumúla 10. Húsið verður opnað klukkan 10.15 og lokar fyrir skráningu klukkan 10.30. Þátttakendum er þá  beint inn í afmarkað rými og verður blásið til skiptingarinnar á slaginu 11. Þátttakendur eru því beðnir um að mæta tímanlega.

„Þetta verður skemmtilegur dagur. Það verður ljósmyndari á svæðinu, það verður happdrætti og matur. Við hvetjum alla til þess að skrá sig og taka þátt í þessu með okkur,“ segir Helga að lokum.

Hér er hægt að skoða Facebook síðu viðburðarins.

Hér að neðan má sjá taubleyjuviðburðinn í Flórída á síðasta ári.