Ísland lýsti yfir vonbrigðum á fundi Alþjóðahvalveiðiráðsins

Á aðalfundi Alþjóðahvalveiðiráðsins, sem haldinn var í Slóveníu dagana 15.-18. september, lýsti Ísland vonbrigðum sínum með að tímabundið bann við hvalveiðum sem tók gildi árið 1986, hefði enn ekki verið endurskoðað.

Í tilkynningu á vef Utanríkisráðuneytisins segir að slík endurskoðun hefði átt að fara fram eigi síðar en árið 1990 en það hefði ekki hlotið stuðning innan ráðsins síðan. „Niðurstöður rannsókna sýna að margir hvalastofnar hafa þegar náð þeirri stærð að nýta megi þá á sjálfbæran hátt,“ eins og þar stendur.

Meðal mála sem afgreidd voru á fundinum var kvóti fyrir frumbyggjaveiðar Grænlendinga, en ráðið hafði lagst gegn þessum veiðum á seinasta fundi sínum árið 2012. Samkvæmt niðurstöðu ráðsins mega Grænlendingar veiða árlega næstu fjögur árin 19 langreyðar, 176 hrefnur, 2 norðhvali og 10 hnúfubaka.

ESB greindi ráðinu þá frá yfirlýsingu sem stjórnvöldum á Íslandi var afhent fyrr í þessari viku þar sem hvalveiðum Íslendinga í atvinnuskyni var mótmælt. Ísland undirstrikaði að veiðarnar væru sjálfbærar og í samræmi við veiðiráðgjöf sérfræðinga Hafrannsóknastofnunar og úttektir vísindanefnda Norður-Atlantshafs sjávarspendýraráðsins (NAMMCO) og Alþjóðahvalveiðiráðsins.

Jóhann Guðmundsson, skrifstofustjóri í atvinnu- og nýsköpunarráðuneyti fór fyrir sendinefnd Íslands.