Árni Þór fær 630 þúsund á mánuði til áramóta

Árni Þór Sigurðsson fráfarandi þingmaður Vinstrihreyfingarinnar græns framboðs á rétt á biðlaunum næstu sex mánuði. Biðlaunin nema þingfarakaupi sem er rúmlega 630 þúsund krónur á mánuði að sögn Karls Magnús Kristjánssonar, aðstoðarskrifstofustjóra Alþingis.

„Þegar þingmaður hættir störfum eða segir af sér þingmennsku á hann rétt á biðlaunum í allt að sex mánuði. Hins vegar lækka þau sem nemur þeim launum viðkomandi tekur við í nýju starfi,“ segir Karl Magnús.

Árni Þór hefur störf hjá utanríkisráðuneytinu sem sendiherra um áramótin. Þá má búast við að biðlaunin falli niður. Fram til þess tíma fær Árni Þór 630 þúsund krónur á mánuði frá Alþingi nema hann taki að sér aðra launaða vinnu í millitíðinni. Þá munu biðlaunin lækka sem hinum nýju laununum nemur.