Óánægðir með sameiningu heilbrigðisstofnana

Hollvinasamtök Heilbrigðisstofnunarinnar á Sauðárkróki lýsa yfir megni óánægju með ákvörðun heilbrigðisráðherra um sameiningu stofnunarinnar í Heilbrigðisstofnun Norðurlands.

Yfirlýst markmið sameiningarinnar munu vera að styrkja rekstra- og stjórnunareiningar, auka öryggi íbúa með góðri heilbrigðisþjónustu og nýta fjármuni betur. Þá á sameiningin að færa ákvarðanatöku í auknu mæli frá ráðuneyti til heimamanna.

Í yfirlýsingu frá samtökunum segir að þrátt fyrir ítrekaðar fyrirspurnir heimamanna hafi ekki fengist svör um hvernig þessum markimiðim skal náð.

„Markmið þessi eru ekki trúverðug í ljósi þess að þrátt fyrir ítrekaðar óskir framkvæmdastjóra og starfsmanna HS, sveitarstjórnarfulltrúa í Skagafirði og Hollvinasamtakanna hafa engin svör fengist við ofangreindum spurningum eða yfir höfuð hvernig ráðherra/ráðuneyti sér fyrir sér að starfsemi stofnunarinnar verði eftir sameiningu,“ segir í yfirlýsingunni.

Þá segir að fram til þessa hafi ráðherra og ráðuneyti hunsað allar óskir heimamanna.

„Meðan ekki er hægt að sýna fram á hvernig ofangreind markmið ráðuneytisins eiga ða nást má leiða líkur að því að samining stofnana á svo stóru svæði muni leiða til eftirfarandi:

Rekstrar- og stjórnunarumhverfi stofnunarinnar mun veikjast þar sem ákvörðunarvaldið færist fjær henni.

Öryggi íbúanna verður frekar ógnað þar sem fara þarf um langan veg til að nálgast ýmsa þjónustu sem nú er til staðar í heimabyggð.

Kostnaður vegna heilbrigðisþjónustu almennt mun aukast eftir því sem íbúar þurfa að fara um lengri veg til að sækja sér þjónustuna, með tilheyrandi vinnutapi og óhagræði fyrir íbúana.

Stjórnunarvald stofnunarinnar mun færast fjær og ákvarðanavald heimamanna mun því veikjast til muna.

Nú þegar er erfitt að fá lækna og hjúkrunarfólk til starfa á landsbyggðinni. Sameining stofnana á svo stóru svæði mun auka ennfrekar á þá erfiðleika.

Sameining stofnana mun leiða til enn frekari brottflutnings menntaðs starfsfólks þeirra og þannig veikja enn frekar byggðirnar umhverfis þær.“

„Það er með öllu ólíðandi að ráðherra og ráðuneyti hans skuli fara fram með þeim hætti sem raun ber vitni. Hollvinasamtök Heilbrigðisstofnunarinnar á Sauðárkróki skora á ríkisstjórn Íslands að grípa inn í þann óheillafarveg sem málið er komið í og ljúka nú þegar þeim viðræðum sem hafnar eru við Sveitarfélagið Skagafjörð um yfirtöku á rekstri HS og hlusta á vilja heimamanna.“