Tvö þúsund tonn óseld af lambakjöti fyrir sláturtíð

Tæplega tvö þúsund tonna birgðir af lambakjöti eru til í landinu í lok júlí. Það er 250 tonnum meira en í fyrra. Söluvæntingar hafa ekki gengið eftir, hvort sem er innanlands eða á erlendum mörkuðum.

Sauðfjárbændur hafa lýst yfir óánægju með litla hækkun á afurðaverðskrá tveggja sláturleyfishafa. Hækkunin á kíló af lambakjöti nemur tveimur krónum en verð fyrir annað kindakjöt stendur í stað á milli ára. Mikill afgangur af kjöti eftir slátrun síðasta árs er lítill hvati til að hækka afurðaverð til bænda.

„Það eru vonbrigði að það gangi ekki betur að selja og það helst í hendur að ef það gengur ekki vel að selja þá skilar það sér ekki til okkar í hærra afurðaverði,“ segir Þórarinn Ingi Pétursson, formaður Landssamtaka sauðfjárbænda.

Hann segir að markaðssetning á lambakjöti þurfi að verða mun öflugri en nú er. „Ég hugsa að ef Mjólkursamsalan væri með svipaða þróun í vörunúmerum og við, þá væru þeir næstum því bara að selja bláa mjólk. Við getum lært mikið af þeim.“

Samkvæmt Þórarni hafa erlendir markaðir ekki tekið við sér að því marki sem vonast var eftir.

„Við höfðum væntingar um að það færi að opnast eitthvað varðandi fríverslunarsamninginn við Kína og einnig að það liðkaðist til varðandi til dæmis Spán en það hefur bara ekki orðið enn. Um 2010 fór mikið til Spánar og Bretlands en það virðist vera þyngra á þeim bænum núna. Það hangir saman við það hvernig fjárhagur almennings á þeim svæðum er.“

Ágúst Andrésson, formaður Landssamtaka sláturleyfishafa, segir að ekki sé við erlenda markaðinn að sakast.

„Það hefur komið niður á okkur núna að hafa ekki haft nógu gott grillsumar annað árið í röð í bænum. Það er fljótt að segja til sín í sölu. Það lítur ágætlega út með erlendu markaðina en innlendi markaðurinn er ekki jafn sprækur og hann þyrfti að vera þrátt fyrir alla ferðamennina. Menn þurfa að fara í meiri markaðsvinnu þar.“