Leikhópurinn Lotta lenti í veðurhremmingum

Leikhópurinn Lotta lenti í ekta íslenskum veðurhremmingum í aðdraganda sýningar þeirra í Gilsfirði á Vesturlandi síðastliðinn sunnudag. Lítill skýstrókur gerði sig þá líklegan til að hafa á brott leikmynd hópsins.

„Þar var búið að vera töluvert vindasamt en samt að lægja þegar við byrjum að koma okkur fyrir,“ segir Stefán Benedikt Vilhelmsson, leikfélagi í Lottu. „Við vorum búin að setja niður hluta af leikmyndinni þegar við fáum á okkur vindhviðu, sem var eiginlega svona bara lítill skýstrókur. Hann lyftir bara þessum 400 til 500 kílóum af leikmynd upp í loftið og fleygir þeim yfir þrjá leikara.“

Tveir meðlimir hópsins slösuðust við þetta og tafðist uppsetning leikmyndarinnar um nokkra stund. Næst var leikmyndin borin upp brekkuna og flutt inn í tjald.

„Við vorum búin að setja það svona að hálfu leyti upp þegar tjaldið byrjaði að fjúka,“ segir Stefán. „Og það þurfti eina sex fíleflda karlmenn til að halda því niðri á meðan við rifum leikmyndina aftur niður þar og komum henni ofan í kerru.“

Illþýðið slasaðist

Svo fór að leikhópurinn þurfti að flytja sig upp á loft gamla skólahússins á svæðinu og var þar flutt um það bil klukkutíma söngskemmtun fyrir um hundrað börn og fullorðna. Má því segja að betur hafi farið en á horfðist.

„Við gátum að vísu ekki verið með leikmyndina, en þetta bjargaðist fyrir horn,“ segir Stefán. „Það vildi líka svo heppilega til að þeir sem slösuðust eru sko illþýðið, eða vonda fólkið, í sýningunni. Þannig að þetta hjálpaði kannski bara til frekar en hitt. Ein er með hálskraga og haltrandi og hinn með nokkra marbletti.“

Að sögn Stefáns hafa aðrir leikfélagar verið mjög góð við þau slösuðu svo að þau komist í gegnum síðustu sýningarnar á ferðalaginu. Þær verða í Elliðaárdalnum nú á mánudag, þriðjudag og miðvikudag í næstu viku.