Harðar brugðist við orðum innflytjenda

„Það er eins og innflytjendur eigi ekki að fá að tjá skoðun sína á málefnum sínum,“ segir Anna Kristinsdóttir, mannréttindastjóri Reykjavíkurborgar.

Í gær kynnti mannréttindaráð Reykjavíkur greiningu á hatursorðræðu sem Bjarney Friðriksdóttir, doktorsnemi í Evrópuráðgjöf, vann fyrir ráðið. Þar kemur fram að Íslendingar bregðast harðar við ef innflytjandi hefur sig í frammi um málefni innflytjenda en þegar íslenskur talsmaður gerir það.

Samkvæmt greiningunni ber talsvert á ummælum sem einkennast af kynþáttafordómum í umræðunum á íslenskum fréttanetmiðlum. Algengast er að slík ummæli séu sett fram í garð múslima. Skemmst er að minnast morðhótunar sem Salmann Tamimi kærði, fyrrverandi formaður Félags múslima á Íslandi, en sá ósómi leit dagsins ljós í umræðunni um byggingu mosku í Reykjavík. Einnig eru algeng ummæli sem einkennast af þjóðernishyggju og ný-rasisma, samkvæmt greiningunni.

Bjarney hafði úr nægu að moða því hún las tæp fimmtán þúsund ummæli og var aðeins fjórðungur þeirra skrifaður af konum.

Reykjavík er nú í aðlögunarferli til að fylla flokk Evrópuráðsins yfir alþjóðlegar borgir eða Intercultural city eins og verkefni ráðsins er kallað. Alls eru sextíu borgir á þeim lista og svo Reykjavík komist á hann verður hún meðal annars að standast úttekt sem eftirlitsmenn ráðsins munu gera og eru þeir væntanlegir á haustmánuðum. Þeir munu kanna hvernig borgin sinnir innflytjendum.

Efnisflokkarnir sem skoðaðir voru í greiningunni voru flóttafólk, fólk af erlendum uppruna eða innflytjendur, bygging mosku í Reykjavík, jafnrétti kynjanna, femínismi, kynferðislegt ofbeldi og hinsegin fólk.