Ummæli ráðherrans herða læknadeiluna

Loforð Bjarna Benediktssonar fjármálaráðherra um að hafist verði handa við byggingu nýs Landspítala á þessu kjörtímabili hefur engin áhrif á kjaraviðræður lækna. Þetta segir Sigurveig Pétursdóttir, formaður Læknafélags Íslands, í samtali við Fréttablaðið. Bjarni sagði í samtali við Stöð 2 um helgina að vinna við nýjan Landspítala geti hafist á kjörtímabilinu.

„Við erum ekki að semja um spítala, ekki frekar en fólkið sem vinnur í Bónus semur um hvað verður gert við kornflexið í búðunum. Þetta hefur engin áhrif á okkur,“ segir Sigurveig.

Á fundinum sagði ráðherrann jafnframt að kröfur lækna um margra tuga prósenta launahækkun væru óraunhæfar. Sigurveig segir slíkt ekki heldur hafa áhrif á viðræðurnar. „Við höldum bara áfram, við vitum hvað við þurfum. En auðvitað er þetta ekki hvetjandi,“ segir Sigurveig.

Samninganefndin fundaði í gær með samninganefnd ríkisins og til umræðu voru atriði er varða vaktafyrirkomulag lækna. Sigurveig segir það tímafreka vinnu og gerir ekki ráð fyrir að hægt verði að ná saman í vikunni.

Verkfallsaðgerðir lækna héldu áfram í gær og standa yfir þar til á fimmtudag, þegar meðal annarra svæfingar- og skurðlæknar leggja niður störf.

Í pistli Páls Matthíassonar, forstjóra Landspítalans, á heimasíðu spítalans sem birtist á föstudag segir að dragist verkfallið á langinn út boðaðan tíma til 11. desember megi ætla að um 800 skurðaðgerðum verði frestað.

Læknar sem Fréttablaðið hefur haft samband við segja ljóst að yfirlýsingar Bjarna um að ekki verði gengið að launakröfum lækna í þeirri mynd, sem þær eru í dag, séu til þess fallnar að færa hörku í kjaradeiluna.

Ekki hefur náðst í fjármálaráðherra vegna verkfalls lækna þrátt fyrir ítrekaðar tilraunir.