Stór hluti makrílsins er við Ísland

Tæpur fimmtungur alls makríls í Norðaustur-Atlantshafi, eða tæp 18 prósent, mældist innan íslenskrar efnahagslögsögu í nýafstöðnum rannsóknarleiðangri.

Um er að ræða rannsókn sem Íslendingar taka þátt í ásamt Norðmönnum, Færeyingum og Grænlendingum.

Ekki veitti af samstöðunni því rannsóknasvæðið var um 2,45 milljónir ferkílómetra. Innan þess mældust níu milljónir tonna af makríl og af þeim um 1,6 milljónir tonna sem mældust í íslenskri lögsögu.

Þéttleikinn á öllu svæðinu reyndist sá mesti frá því makrílmælingar hófust árið 2007. Mestur er makríllinn innan lögsögu Norðmanna en þar mældist fjórðungur makrílsins.

Árni Friðriksson, rannsóknaskip Hafrannsóknastofnunar sem tók þátt í leiðangrinum, er nú á leiðinni til Akureyrar þar sem hann fer í slipp.