Stjórnarandstöðunni hugnast ekki að hafa þrjá seðlabankastjóra

Már Guðmundsson var í gær skipaður Seðlabankastjóri til fimm ára. Í skipunarbréfi til Más er bent á að fjármálaráðherra hafi skipað nefnd um heildarendurskoðun laga um Seðlabankann sem „geta haft áhrif á störf yðar hjá bankanum“ segir í skipunarbréfinu.

Már Guðmundsson sendi frá sér yfirlýsingu þar sem hann sagði óvíst hvort hann myndi sækjast eftir endurráðningu yrði lögum um yfirstjórn Seðlabankans breytt.

Steingrímur J. Sigfússon, fyrrverandi fjármálaráðherra, er sáttur við ráðninguna en hugnast ekki breytingar á lögum um yfirstjórn Seðlabankans, en hann situr í samráðshópi um endurskoðun laga um bankann. „Eitt er að uppfæra einhver ákvæði laga, annað væri að opna á grundvallar skipulags- og kerfisbreytingar. Ég held að það síðasta sem við þurfum sé að að skapa óróleika um þessa mikilvægu stofnun,“ segir Steingrímur.

Guðmundur Steingrímsson, formaður Bjartrar framtíðar, tekur undir orð Steingríms. „Ég hef ekki séð neinar sérstakar röksemdir fyrir fjölgun seðlabankastjóra,“ segir Guðmundur en bætir við að sjálfsagt sé að bíða eftir niðurstöðu endurskoðunarnefndarinnar.

Oddný G. Harðardóttir, þingmaður Samfylkingarinnar og varaformaður fjárlaganefndar, segist ekki sjá þörf fyrir þrjá seðlabankastjóra. Oddný segir furðulegt að auglýsa starfið áður en heildarendurskoðun laga um bankann sé lokið. „Það var náttúrulega mjög skrítið. Það gaf til kynna að verið væri að huga að breytingum á lögum um Seðlabankann sem ekki er búið er að hugsa til enda.“

Aðspurður hvort lög um peningastefnunefnd verði einnig tekin til endurskoðunar segir Bjarni Benediktsson, fjármálaráðherra, það ekki vera meginatriði í vinnunni sem endurskoðunarnefndinni var falið. Þó sé umhugsunarvert að „formlega séð getur sú staða skapast að seðlabankastjóri, sem ráðinn er lögum samkvæmt á grundvelli sérfræðiþekkingar og menntunar, geti orðið í minnihluta í peningastefnunefnd gagnvart starfsmönnum sem eru lægra settir en hann í bankanum og ekki eru gerðar jafn miklar kröfur til,“ segir Bjarni en bætir þó við að koma verði í ljós hvort endurskoðunarnefndin leggi fram einhverjar tillögur varðandi peningastefnunefnd.