Stöðugildi þess sem sá um tölurnar hjá Hagstofunni var lagt niður

Samkvæmt árshlutauppgjöri Hagsýslu ríkisins fór Landsbókasafn/Háskólabókasafn 106 milljónir fram úr fjárheimildum á fyrri hluta ársins.

„Við kaupum áskriftir að erlendum fræði- og vísindatímaritum, fyrir skóla landsins, stofnanir og bókasöfn og tryggjum að allir landsmenn hafi aðgang að þessu efni í gegnum vefinn Hvar.is. Undanfarin ár höfum við sent út reikninga fyrir þessum áskriftum í júní en í ár dróst það fram í júlí og það skýrir 60 til 70 milljónir af framúrkeyrslunni,“ segir Ingibjörg Steinunn Sverrisdóttir landsbókavörður.

Ingibjörg segir að það sé nokkuð flókið reiknilíkan á bak við áskriftarreikningana, sem hafi byggst á tölum frá Hagstofunni. Það hafi hins vegar orðið niðurskurður á Hagstofunni og stöðugildi þess sem sá um tölurnar hafi verið lagt niður.

„Niðurskurður á Hagstofunni orsakaði vandræði hjá okkur,“ segir landsbókavörður.

Hún segir að það hafi því dregist að senda út reikningana. Menntamálaráðuneytið hafi loks útvegað tölur inn í reiknilíkanið og þá hafi verið hægt að senda út reikningana. Reikningarnir verði væntanlega greiddir innan skamms.

Ingibjörg segir að kjarasamningar sem gerðir voru á fyrri helmingi árisins hafi líka sett strik í reikninginn auk annarra kostnaðarhækkana en þrátt fyrir það eigi hún von á að þegar árið verður gert upp í heild verði Landsbókasafn/Háskólabóksafn innan fjárheimilda.

Veðurstofa Íslands fór 123 milljónir króna fram úr heimildum á fyrri helmingi ársins, samkvæmt útreikningum Hagsýslunnar. Veðurstofan hafnar því og segir að rekstur Veðurstofu Íslands sé að miklu leyti fjármagnaður með sértekjum eða sem nemur tæpum 60 prósent af heildarfjármögnun stofnunarinnar og má þar nefna þjónustu við alþjóðaflugið, Ofanflóðasjóð og þjónustu- og rannsóknarverkefni. Vegna þessa er dreifing tekna innan ársins ójöfn og er reynt að gera ráð fyrir því í greiðsluáætlun ársins.

Umfjöllunin í fréttum byggist á ársfjórðungsstöðu fjárreiða ríkissjóðs en ekki var búið að færa allar sértekjur fyrstu sex mánuði ársins til tekna í bókhaldi stofnunarinnar þegar staðan var tekin út, sem skýrir frávikið.