Enginn afsláttur gefinn á hallalausum fjárlögum

„Mikill meirihluti ríkisstofnanna eru að taka á með stjórnvöldum og eru innan heimilda. Ákveðnar stofnanir sem hafa fengið mikið fjármagn, til dæmis Landspítalinn, eru samt að keyra fram úr.“ Þetta segir Vigdís Hauksdóttir, en hún var gestur í Bítinu á Bylgjunni í morgun.

Þar ræddi hún um það að stofnanir hafi farið yfir fjárlög og sagði tímabært að berja í borðið gegn því.

„Eins og allir hafa fundið á eigin skinni urðu hér ríkisstjórnarskipti fyrir rúmu ári. Það hefur orðið mikill viðsnúningur á þessu eina ári og mjög mikill árangur hjá ríkisstjórninni á þessu eina ári. Enda voru markmiðin skýr og það var forgangsraðað í þágu þjóðarinnar og almannahagsmuna.“

Hún sagði að enginn afsláttur yrði gefinn á því að fjárlög yrðu hallalaus 2014. Það væri skýr stefna stjórnvalda og þessarar ríkisstjórnar.

„Það er orðið tímabært að það sé slegið í borðið og þetta munstur verði rofið. Þetta verður ekki liðið lengur því það er erfitt að reka mörg ríki í ríkinu. Ríkið á að sjá um almannahagsmuni fyrir okkur öll. Það er mikil ábyrgð sem er lögð bæði á fjármálaráðherra og fjárlaganefnd að ráðstafa skattfé þeirra sem eru á vinnumarkaði með réttlátum hætti.“

Krefjast sparnaðar

„Það eru tímamót núna. Fjárlaganefnd tekur hlutverk sitt alvarlega vegna þess að hún hefur það hlutverk að fylgjast með fjárlögum ríkisins. Út af því erum við að spyrna við fæti núna, um miðjan ágúst, eftir að tölur úr hálfsársuppgjöri ríkisins liggja fyrir og kalla til okkar ráðunauta og fá skýringar.“

Þá segir Vigdís að einhverjar stofnanir eigi líklega eftir að rétta sig af þótt tíu stofnanir hafi farið fram úr sem nemi hundrað milljónir. Hún sæi ekki í fljótu bragði hvernig þær gætu rétt sig af.

Vigdís segir að gerð verði krafa um að sparað sé á öðrum stöðum.

„Þetta er bara eðlileg krafa og hver stofnun verður að reka sig eins og fyrirtæki, því það er ekki hægt að safna upp yfirdrætti,“ segir Vigdís.

„Við þurfum líka að breyta þeim kúltúr hjá opinberum stofnunum eins og kom fram í máli upplýsingafulltrúa Vegagerðarinnar, þegar það er orðið ljóst að þeir eru að fara mjög fram úr fjárheimildum. Að þeir hafi alltaf getað fengið náð fyrir augum fjárlaganefndar í fjáraukalögum eða fengið aukið framlag til rekstursins.“

Þetta viðhorf segir hún ekki vera boðlegt árið 2014.

„Hér erum við að fara í gegnum mikinn sparnað og niðurskurð. Ef þetta er viðhorf stofnana þá eru þær á rangri braut. Allavega hjá þeim stjórnvöldum sem sitja núna.“

Sárt fyrir þá sem standa fjárlög

„Mikill meirihluti ríkisstofnanna eru að taka á með stjórnvöldum og eru innan heimilda. Ákveðnar stofnanir sem hafa fengið mikið fjármagn, til dæmis Landspítalinn, eru samt að keyra fram úr,“ segir Vigdís.

„Ég get nefnt lögregluembættin. Þau fengu auka 500 milljónir í fyrra og samt eru lögregluembætti að keyra fram úr.“

Hún segir að líta þurfi á þetta með jafnræðissjónarmiði milli ríkisstofnana. Að þeim sem standi sig vel fái hrós fyrir.

„Þá er mjög erfitt fyrir þá að horfa upp á að sömu stofnanirnar geti komið og fengið meira fé.“