Nú er tími íslensks grænmetis í verslunum

„Það er allt komið en í mismiklu magni,“ segir Gunnlaugur Karlsson, formaður Sölufélags garðyrkjumanna, um framboðið á íslensku grænmeti í verslunum.

Nú er sá tími ársins sem hægt er að kaupa allar tegundir af fersku íslenskt grænmeti.

„Ágúst er stóri uppskerumánuðurinn. Gulræturnar eru að fara að detta inn. Framboð af kartöflum kemst í alvöru hámark eftir næstu viku. En það er alltaf áhætta á meðan þetta er í jörðinni enn þá,“ segir Gunnlaugur.

Hann segir alltaf ákveðnar sveiflur í vinsældum tegunda. „Það eru tískubylgjur í þessu. Grænkálið er svolítið í tísku núna. Fólk er bæði að steikja það á pönnu og borða það ferskt.“

Hnúðkál á dyggan aðdáendahóp

Hjá garðyrkjubændum kennir ýmissa grasa og segir Gunnlaugur að alltaf séu að bætast við nýjungar. „Hnúðkál er skemmtileg nýjung sem bættist við fyrir tveimur, þremur árum. Það er stór hópur sem sækir í þetta á hverju ári. Svo er sæt paprika nýjung hjá okkur, hún er ílöng og bragðgóð. Við höfum líka verið að auka framboð á kryddjurtum í pottum.“

Gunnlaugur segir að allur gangur sé á því hvort íslenskt grænmeti sé dýrara en erlent. „Það eru bæði dæmi um grænmeti sem er ódýrara og dýrara, sumt er meira að segja mun dýrara en það fer allt eftir tegundum.“

Grænmetisneysla Íslendinga hefur aukist síðustu ár en betur má ef duga skal að mati Gunnlaugs. „Við þurfum að tvöfalda neysluna á grænmeti til að ná manneldismarkmiðum. Þetta er stórt heilsufarsspursmál. En þetta er allt á leiðinni. Þetta verður kannski komið eftir áratug.“

Gunnlaugur segir verslunareigendur sífellt verða meðvitaðri um kosti fersks grænmetis. „Það er ákaflega ánægjulegt hve mjög íslenskir kaupmenn kappkosta að bjóða upp á grænmeti.“

Einn þeirra er Úlfur Eggertsson, verslunarstjóri Víðis í Skeifunni. Úlfur segir starfsmenn Víðis finna fyrir miklum áhuga neytenda á íslensku grænmeti. „Það er mjög mikið hringt og spurt. Það myndast hálfgerð markaðsstemning hjá okkur á þessum tíma. Sérstaklega þegar kartöflurnar koma,“ segir Úlfur og bætir við að allar tegundir íslensks grænmetis séu nú komnar í verslanir Víðis.

Dansa af gleði

„Við dönsum af gleði,“ segir Sigvaldi Jónsson, formaður Samtaka grænmetisæta á Íslandi, um að ferskt, íslenskt grænmeti sé nú að koma inn í verslanir.

„Það verður gott að fá grænmeti sem telst nægilega gott til átu,“ segir Sigvaldi sem verður oft fyrir vonbrigðum með erlent grænmeti í verslunum hér á landi. „Grænmetið er rosalega misjafnt, stundum fær maður vöru sem dugar ekki í sólarhring í ísskáp. En sumar verslanir eru betri en aðrar,“ segir Sigvaldi.