Píratar vilja frumlegri lausnir en hraðahindranir

„Það eru til ýmsar aðferðir aðrar til að draga úr hraða en hraðahindranir sem gefast ágætlega,“ segir Halldór Auðar Svansson, fulltrúi Pírata í borgarstjórn. Píratar höfðu það á stefnuskrá sinni fyrir kosningar í vor að taka hraðahindranir til gagngerrar endurskoðunar og leita annarra leiða til þess að hægja á umferð í borginni.

„Það er mikilvægt að umferðin gangi greiðlega fyrir sig en líka að mismunandi ferðamátar virki vel saman, akandi, hjólandi og gangandi fólk,“ útskýrir Halldór en stefna Pírata er að styðja við mismunandi samgöngumáta.

Hugmyndir Pírata eru ekki fyllilega mótaðar eins og er en vilji er fyrir því að finna frumlegar og skemmtilegar lausnir sem jafnframt eru praktískar. Hann bendir á nýlega frétt um íbúa í Bergstaðastræti sem greip til þess ráðs að koma fyrir blómum á götunni til þess að draga úr hraða.

„Það eru ýmsar leiðir sem hafa verið prófaðar með ágætum árangri erlendis.“ Nefnir hann til að mynda ákveðna samgönguleið í Hollandi og Bretlandi þar sem allir ferðamátar hafa jafnan rétt og fólk stýrir því sjálft hver hefur forgang.

Ólafur Bjarnason, samgöngustjóri Reykjavíkur, segir borgina taka jákvætt í alla umræðu. Engar reglur eru í gildi um hraðahindranir og engir séríslenskir staðlar til um byggingu þeirra. Þær verkfræðistofur sem sjá um hraðahindranir styðjast við norræna hönnunarstaðla.

„Við erum alltaf að þróa nýjar lausnir og breyta til.“ Ólafur fær talsvert af kvörtunum vegna hraðahindrana og þá í báðar áttir – bæði eru þær taldar of háar og of lágar.

Meðal þeirra sem hafa látið í sér heyra vegna óhentugra hraðahindrana eru strætóbílstjórar. Þeir hafa talað fyrir svokölluðum koddahindrunum sem fara betur með bílana. Kolbeinn Óttarsson Proppé, upplýsingafulltrúi Strætó, segir háar hraðahindranir fara illa með bílana.

„Bílarnir eru svo langir að á þessum kröppu hraðahindrunum rekst botninn á bílnum alltaf í hindrunina.“ Hafa hlotist af þessu einhverjar skemmdir.