Segja Íbúðalánasjóð úr takti við uppgang á Vestfjörðum

„Þeir hjá Íbúðalánasjóði ættu að taka af sér inniskóna og koma hingað vestur til að komast í takt við það sem hér er að gerast,“ segir Indriði Indriðason, sveitarstjóri Tálknafjarðar. Sveitarfélagið hefur verið að selja fasteignir en þá hefur það brunnið við, að sögn Indriða, að Íbúðalánasjóður vefengi söluverð þegar kaupandi sækist eftir láni. Vilji sjóðurinn þá sjálfur fá að meta söluvirðið sem síðan sé langt undir umsaminni upphæð. „Það er nánast verið að væna okkur um skjalafals,“ segir hann og bætir við að þetta sé afar óeðlilegt inngrip í fasteignamarkaðinn fyrir vestan.

Jón Edvald Halldórsson, kaupfélagsstjóri og stjórnarmaður í fasteignafélaginu Hornsteinum á Hólmavík, segist einnig þekkja slík dæmi þaðan og að mat Íbúðalánasjóðs sé venjulega undir fasteignamati þó svo íbúðir hafi verið að seljast yfir því að undanförnu.

„Kaupandi og seljandi geta alltaf komið sér saman um ákveðið verð en á endanum er það verð sem fasteignasali metur fyrir Íbúðalánasjóð sem myndar grundvöll að lánsfjárhæð. Markmiðið er að tryggja að það sé nægjanlegt veð til staðar í lánveitingum,“ segir Sigurður Erlingsson, forstjóri Íbúðalánasjóðs. „Við viljum fá raunhæft mat á virði eignarinnar. Og við sem lánveitandi viljum leggja sjálfstætt mat á það hvað verðið er. Þetta eru bara fagleg og vönduð vinnubrögð sem við höfum innleitt,“ segir Sigurður.

Fasteignamarkaðurinn var í mikilli lægð víðast á Vestfjörðum í árafjöld enda hefur fólksfækkun þar verið mikil síðustu áratugi. Nú er hins vegar annað uppi á teningnum, til dæmis á sunnanverðum Vestfjörðum. Þar er hafin mikil uppbygging samhliða miklu umfangi í fiskeldi nokkurra fyrirtækja. Eins segir Indriði að aukin tækifæri hafi opnast í ferðaþjónustu á svæðinu.

Skortur hefur verið á íbúðum í Vesturbyggð og Indriði segir sömu sögu frá Tálknafirði. Sveitarfélagið hefur því samþykkt að reisa átta íbúðarhús á svæðinu sem telst til tíðinda þar sem afar fá slík hafa risið á sunnanverðum Vestfjörðum í árafjöld. Indriði segir að hugsanlega verði að bæta enn fleiri íbúðum við þegar fram í sækir.