Iðkun íþrótta hjálpar börnum sem verða fyrir einelti í skóla

Iðkun íþrótta dregur úr neikvæðum afleiðingum eineltis, að minnsta kosti hjá strákum. Þetta eru niðurstöður rannsóknar vísindamanna við Gautaborgarháskóla sem studdust við gögn úr könnun á Norðurlöndunum, NordChild survey 2011, meðal foreldra 6.214 barna á aldrinum fjögurra til 16 ára. Greint er frá þessu á vefnum sciencenordic.com. Þar segir að samkvæmt svörum foreldranna hafi 15 prósent strákanna og 13 prósent stelpnanna orðið fyrir einelti.

Niðurstöður rannsóknarinnar við Gautaborgarháskóla sýna að neikvæðar afleiðingar eineltis komi frekar fram hjá strákum en stelpum. Iðkun íþrótta auðveldaði þeim að takast á við eineltið. Rannsóknin leiddi jafnframt í ljós að íþróttaiðkun gagnaðist ekki stelpum á sama hátt. Haft er eftir einum vísindamannanna, Ylve Bjereld, að skýringin sé mögulega sú að strákar og stelpur stundi ekki sams konar íþróttir.

Áður hefur verið sýnt fram á að íþróttaiðkun, einkum iðkun hópíþrótta, auki sjálfstraust og dragi úr þunglyndiseinkennum, að því er segir í frétt sciencenordic.com.

Vanda Sigurgeirsdóttir, fótboltaþjálfari og lektor í tómstunda- og félagsmálafræði við Menntavísindasvið Háskóla Íslands, hefur rannsakað einelti og sérstaklega út frá sjónarhorni barna. „Ég veit um dæmi þar sem börn voru lögð í einelti í skóla en sluppu við neikvæðar afleiðingar þess af því að umhverfið í íþróttunum var gott. Félagsskapurinn og vináttan er verndandi. Sjálfstraustið og sjálfsmyndin ræðst af þeim skilaboðum sem fást úr umhverfinu og ef vel er gert geta íþróttir verið frábær forvörn. En að sama skapi geta þær verið vettvangur þar sem einelti þrífst og börn eru niðurlægð ef fullorðna fólkið, og þá sérstaklega þjálfararnir, er ekki á varðbergi.“

Hún nefnir í því samhengi til dæmis skiptingu í lið eftir getu. „Slík skipting getur verið mjög viðkvæm fyrir börn og það skiptir miklu máli hvernig það er gert. Þjálfarar þurfa jafnframt að gæta að því að sinna öllum börnum jafnt óháð getu. Vináttan hættir að vera verndandi þegar barn er tekið frá vinum sínum og sett í annað lið.“