20 þúsund nota séreignina í íbúðalán

Á miðnætti á mánudagskvöld höfðu 12.705 manneskjur sótt um að ráðstafa séreignarsparnaði sínum til greiðslu inn á fasteignaveðlán. Að auki eru um 7.400 manns að vinna í opinni umsókn.

„Maður gerði sér ekki alveg grein fyrir hvernig þetta yrði en ég held að þetta sé nokkuð í takt við það sem maður bjóst við. Það verður hægt að sækja um séreignarsparnað næstu þrjú árin, þannig að það er ekki eins og það sé að lokast eitthvað,“ segir Tryggvi Þór Herbertsson, verkefnastjóri um framkvæmd lækkunar húsnæðislána.

Ef fólk vill nýta séreignarsparnað af launagreiðslum frá 1. júlí síðastliðnum til að greiða inn á fasteignaveðlán sín þarf það samt að sækja um fyrir 1. september.

Hvað leiðréttingu verðtryggðra fasteignalána varðar voru umsóknirnar 46.156 talsins á miðnætti á mánudagskvöld og á bak við þær var 70.801 kennitala. Umsóknarfresturinn fyrir leiðréttinguna rennur út 1. september. „Um miðjan ágúst munum við fara í smá herferð til að minna fólk á að það sé að loka, til að það verði örugglega ekki þannig að einhverjir gleymi því. Þá tekur þetta auðvitað kipp.“

Opnað var fyrir umsóknir um leiðréttinguna 18. maí og ráðstöfun séreignarsparnaðar tíu dögum síðar og telur Tryggvi Þór að umsóknarferlið hafi gengið vonum framar. Alls starfa um 60 til 70 manns við verkefnið í tölvufyrirtækjum, bankakerfinu, ráðuneytum og hjá ríkisskattstjóra.

„Núna erum við að vinna í útreikningaforritunum og það gengur bærilega. Við höldum að við getum skilað af okkur niðurstöðum um mánaðamótin september-október. Þá verður gert upp,“ segir hann um leiðréttinguna og bætir við að verkefnið sé á áætlun. „Þegar ég tók við var miðað við að við yrðum búin með megnið af þessu fyrir mánaðamótin september-október. Við höfum náð að komast í gegnum það og ég get ekki sagt annað en að maður sé býsna ánægður.“