Borgarstjórn fundar í fyrsta sinn

SveitarstjórnarmálFyrsti fundur nýrrar borgarstjórnar verður haldinn í Ráðhúsinu í Reykjavík í dag klukkan tvö.

Kjartan Magnússon, borgarfulltrúi Sjálfstæðisflokksins, setur fundinn sem starfsaldursforseti og stýrir fundi þar til Sóley Tómasdóttir, fulltrúi Vinstri grænna, verður kjörin forseti borgarstjórnar. Kosið verður í allar nefndir og ráð en sætum er úthlutað samkvæmt d'Hondt-reglunni.

Dagur B. Eggertsson, verðandi borgarstjóri, segir skipan nefnda verða með sama hætti og áður utan þess að nýtt stjórnkerfis- og lýðræðisráð verður stofnað undir forystu Halldórs Auðar Svanssonar, oddvita Pírata, sem og að nefndarmönnum í skipulagsráði verður fækkað úr níu í sjö.