Hildur safnar fyrir ráðstefnuferð

Söfnun Hildar Lilliendahl fyrir utanferð sinni til Malmö á kvennaráðstefnuna Nordiskt Forum í júní hefur borið tilætlaðan árangur. Hún er búin að bóka flugmiðann, en söfnunin fór fram með hópfjármögnun í gegnum síðuna Indiegogo. Hildur setti sér það markmið að safna um 125 þúsund krónum, og hún er nú þegar búin að safna tæplega 120 þúsund krónum.

Í skiptum fyrir styrki býður Hildur upp á að tagga fólk á Facebook, senda því handskrifað póstkort frá Malmö, eða kaupa gjöf handa því ásamt handskrifuðu póstkorti. Fyrir þúsund evrur heimsækir Hildur bakhjarla, lagar kaffi og bakar brauð.