Sigmundur svarar Obama: „Mikils virði að menn standi á sínum prinsippum"

Sigmundur Davíð Gunnlaugsson gefur lítið fyrir ummæli Barrack Obama Bandaríkjaforseta um að endurskoða samskipti við Íslendinga vegna hvalveiða. Vísir sagði frá því í morgun að Obama hefði í gær sent bandaríska þinginu minnisblað þar sem hvalveiðar Íslendinga eru harðlega gagnrýndar. Íslendingar eru hvattir til þess að hætta að vera hvalveiðiþjóð og gerast í stað þess hvalaskoðunarþjóð, líkt og Bandaríkjamenn hafi gert á sínum tíma.

„Það er ekkert nýtt í yfirlýsingum Bandaríkjaforseta nú – bara endurtekningar á því sem hann sagði 2011. Það varð engin veruleg breyting á samskiptum landanna á milli 2011 og 2013,“ sagði Sigmundur Davíð í óundirbúnum fyrirspurnum á þingi í dag.

Hann sagði erfitt að meta hversu mikils hvalveiðar væru. Hann sagði erfitt að segja til um nákvæmt verðmæti þess að verja prinsipp.

„Það er mikils virði að menn standi á sínum prinsippum og láti ekki mestu hvalveiðiþjóð heims segja okkur að við megum ekki veiða hval.“

Hverju skila hvalveiðar?

Tvær þingkonur lögðu inn fyrirspurnir vegna hvalveiða við upphaf þingfundar í dag. Þær Björt Ólafsdóttir úr Bjartri Framtíð og Sigríður Ingibjörg Ingadóttir úr Samfylkingu.

Björt spurði:

„Ef veiðar á langreyð skipta þjóðina svona miklu máli, hverju skilar það í þjóðarbúið?“ Hún spurði einnig um hverju fyrirtækið Hvalur skilaði í ríkiskassann, í formi veiðigjalda.

Forsætisráðherra svaraði um hæl að vel mætti ræða veiðigjald á hvalveiðar. Hagsmunir Íslendinga snerust hins vegar ekki um þær tölur heldur sjálfsákvörðunarrétt þjóðarinnar.

„Ef við teljum það þjóna hagsmunum okkar að við fáum sjálf að ráða nýtingu okkar auðlinda, sem allir hljóta að vera sammála um, þá hljóta menn að vera tilbúnir að verja sín prinsipp.“

Bandaríkjamenn halda að IKEA sé íslenskt

Sigríður Ingibjörg spurði forsætisráðherra hvort það væri stefna ríkisstjórnarinnar að stefna samskiptum við aðrar þjóðir í hættu vegna hvalveiða.

Sigmundur Davíð svaraði með því að vitna í upplýsingar sem Jón Gunnarsson þingmaður Sjálfstæðisflokksins væri með um Bandaríkjamenn.

„Háttvirtur þingmaður Jón Gunnarsson er fróður um hvalveiðar, hefur ýmsar skemmtilegar staðreyndir um hvalveiðar á takteinunum. Og ég hvet háttvirtan þingmann að leita til Jóns,“ sagði Sigmundur Davíð og bætti við:

„Eitt af því sem Jón gæti sagt háttvirtum þingmanni er að þegar fólk í Bandaríkjunum er spurt hvað komi upp í hugann þegar Ísland er nefnt, þá eru fleiri sem að nefna húsgagnafyrirtækið IKEA en þeir sem nefna hvalveiðar og áhyggjur þeirra af þeim.“

Sigmundur hélt áfram:

„Nú er IKEA ekki beinlínis íslenskt fyrirtæki en engu að síður halda fleiri að við séum að  framleiða húsgögn í meira mæli en nokkur önnur þjóð heldur en að við séum að veiða hvali.“