Þrjú stéttarfélög fella kjarasamninga

Þrjú stéttarfélög hafa felllt kjarasamninga sem skrifað var undir 21. desember síðastliðinn.

Talningu hjá Framsýn á Húsavík, vegna tveggja kjarasamninga sem félagið á aðild að í gegnum Starfsgreinasamband Íslands (SGS) og Landssambands íslenskra verslunarmanna (LÍV), lauk í dag. Atkvæðagreiðslu hjá Drífanda stéttarfélagi lauk eftir hádegið í gær.

Rúmlega 92 prósent félagsmanna Framsýnar hafnaði kjarasamningum SGS og Samtaka atvinnulífsins (SA) og um 89 prósent hafnaði samningum LÍV við SA. Þátttaka í atkvæðagreiðslunni var um 30 prósent en í fréttatilkynningu frá  félaginu segir að þessi afgerandi niðurstaða staðfesti reiði verkafólks með samningana.

Samkvæmt heimildum Eyjafrétta kolfelldu félagsmenn Drífanda samninginn og var kosningaþátttaka góð, en ekki kemur fram hversu mikil hún var.