Hafa undirbúið viðbragðsáætlun vegna ebólu síðan í sumar

Landspítali hefur frá því um mitt sumar undirbúið viðbragðsáætlun ef grunur vaknar um Ebola smit hjá sjúklingi sem annað hvort leitar til eða er vísað á Landspítala.

Þetta kemur fram í tilkynningu frá Landspítalanum. Undirbúningur hefur verið í höndum Farsóttarnefndar spítalans ásamt Gæða- og sýkingavarnardeild og framkvæmdastjórum lækninga og hjúkrunar.

Fjölmargir aðrir hafa komið að undirbúninginum og hefur sérstakur verkefnastjóri umsjón með samhæfingu verkefnisins.

Meðal þeirra verkefna sem unnið hefur verið að eru verklagsreglur fyrir móttöku og meðferð sjúklinga, skipulagning fræðslu og þjálfunar fyrir starfsfólk í viðbragðsteymi og undirbúningur breytinga á húsnæði, svo eitthvað sé nefnt.

Landspítali leggur sérstaka áherslu á greinagóðar upplýsingar til fjölmiðla vegna þessa og hefur í þeim tilgangi sett saman sérstakt samskiptateymi.

Í teyminu starfa þeir stjórnendur og starfsmenn sem undirbúa viðbúnað Landspítala vegna Ebola og mun hluti þeirra einnig starfa í viðbragðsteyminu sjálfu. Undirrituð er tengiliður samskiptateymisins.