Mun meiri stuðningur hjá körlum en konum

Þriðjungur þjóðarinnar, eða 34 prósent, styður ríkisstjórnina samkvæmt könnun Fréttablaðsins. Tæplega helmingur, eða 49 prósent, styður hana ekki. Fjórtán prósent segjast óákveðin en 4 prósent svara ekki spurningunni. Þegar einungis er litið til svara þeirra sem taka afstöðu sést að 41 prósent styður ríkisstjórnina en 59 prósent styðja hana ekki.

Stuðningurinn er meiri meðal karla en kvenna. Fjörutíu prósent karla segjast styðja ríkisstjórnina, 45 prósent segjast ekki styðja hana, þrettán prósent eru óákveðin og 2 prósent svara ekki. Tuttugu og átta prósent kvenna segjast styðja ríkisstjórnina, 53 prósent segjast ekki styðja hana, 15 prósent eru óákveðin og 6 prósent svara ekki. Af þeim sem tóku afstöðu sögðust 47 prósent karla styðja ríkisstjórnina en einungis 34 prósent kvenna.

Þetta er lítil breyting á stuðningi við ríkisstjórnina frá því í könnun sem gerð var í október, en þó innan skekkjumarka, sem eru 3,41 prósent. Þá sögðust 35 prósent styðja ríkisstjórnina og 65 prósent ekki. Könnunin var gerð á miðvikudag og fimmtudag í síðustu viku.

Sveinbjörg Birna Sveinbjörnsdóttir, formaður Landssambands framsóknarkvenna, segist aðspurð ekki hafa áhyggjur af þessum tölum. „En þetta eru hlutföll sem menn eiga að velta fyrir sér og af hverju þessi greinilega marktæki munur stafi,“ segir Sveinbjörg Birna. Hún hafi hins vegar engar niðurnjörvaðar skýringar á því hvers vegna þetta er svo.

„En það má velta því fyrir sér hvort ríkisstjórnin hafi verið að vinna meira í hörðu málunum frekar en þeim mjúku. Því það má sjá mismunandi hlutfall karla og kvenna sem fylgja þeim málum,“ segir hún. Sveinbjörg Birna telur þessar tölur ekki benda til þess að úrræði ríkisstjórnarinnar í skuldamálum hafi skilað sér frekar til karla en kvenna. „Heldur skýrist þetta miklu frekar af mismunandi nálgun karla og kvenna í pólitík,“ segir hún.

„Ánægjulegt er að sjá fylgi ríkisstjórnarinnar aukast og vonandi heldur það áfram í þá átt. Það kemur á óvart að ekki sé meiri stuðningur á meðal kvenna en í því felast tækifæri á sama tíma. Ábyrgur ríkisrekstur, skuldaleiðréttingar og aukið fjármagn til heilbrigðiskerfisins eru áherslur sem ættu að höfða til beggja kynja,“ segir Þórey Vilhjálmsdóttir, formaður Landssambands sjálfstæðiskvenna. „En það er þá mikilvægt að hafa í huga að kynjahlutföll í ríkisstjórn og á Alþingi hafa einnig áhrif á stuðning kvenna, fram hjá því er ekki hægt að líta,“ bætir hún við.