Vilja lækka laun handhafa forsetavalds verulega

Þrír þingmenn stjórnarandstöðunnar vilja að handhafar forsetavalds skuli samanlagt njóta sem svarar til eins tíunda hluta launa forseta þann tíma sem þeir fara með forsetavald um stundarsakir. Brynhildur Pétursdóttir, þingmaður Bjartrar framtíðar, lagði fram frumvarpið í dag og var því dreift á þingi eftir hádegi en Sigríður Ingibjörg Ingadóttir og Svandís Svavarsdóttir eru meðflutningsmenn.

Þetta er þriðja tilraunin til að lækka laun handhafanna. Magnús Orri Schram, þáverandi þingmaður Samfylkingarinnar, flutti samskonar frumvarp fyrir hönd efnahags- og skattanefndar á síðasta kjörtímabili og Árni Þór Sigurðsson, fyrrverandi þingmaður Vinstri grænna, flutti samskonar frumvarp á síðasta ári. Í seinna skiptið átti hinsvegar að fella greiðslurnar niður með öllu.

Samkvæmt núgildandi lögum fá handhafar forsetavaldsins jafn há laun og forseti en handhafar valdsins skipta þeim á milli sín þann tíma sem þeir eru við völd hverju sinni. Frumvarpið gerir ráð fyrir allverulegri lækkun á þessum launum.

Í greinargerð með frumvarpinu kemur fram að greiðslurnar hafi numið um tíu milljónum árlega síðastliðin fimm ár á núverandi verðlagi. Stjórnarskráin heimilar ekki að laun til handhafa forsetavaldsins falli alveg niður og því er lagt til að lækka þau.

Launakjör forsetans eru ákveðin af kjararáði líkt og laun annarra opinberra starfsmanna. Samkvæmt nýjustu launatöflu ráðsins eru mánaðarlaun forseta 1.983.757. Tíundi hluti af því er 198.376 krónur sem myndi skiptast í þrennt. Þingmennirnir þrír telja þetta geta sparað um milljón á ári.

Forsætisráðherra, forseti þingsins og forseti Hæstaréttar fara með forsetavald í fjarveru forseta Íslands. Í dag eru það Sigmundur Davíð Gunnlaugsson, Einar K. Guðfinnsson og Markús Sigurbjörnsson.