Kaldir og örmagna af þreytu

Þrír kajakræðarar voru hætt komnir út af Munaðarnesi í Árneshreppi á Ströndum í gærkvöldi, þegar einn datt úr báti sínum og hinir tveir komust við illan leik og hraktir til lands. Snarráður heimamaður bjargaði þeim þriðja aðfram komnum í sjónum.

Þeir voru að róa frá Ingólfsfirði, en úti af Munaðarnesi lentu þeir í ölduróti og allt fór úrskeiðis. Fólk í landi fylgdist með ferðum þeirra og hringdi í bæinn Munaðarnes og báðu Birgi Guðmundsson, sem þar hefur sumardvöl, að gá að mönnunum, og sá hann þá hvers kyns var:

„Við urðum semsagt var við að mennirnir voru búnir að hvolfa bátunum yfir sig og voru bara á reki tveir þeirra voru komnir upp í land hérna og náðu að bjarga sér af sjálfsdáðum. Einn þeirra komst ekki í land hérna og lenti í brimi hérna í Munaðarnesskerjum sem er einhvern hálfan kílómeter frá landi.

En er það ekki hættulegt fyrir þig að sigla þangað?

„Þetta var svosem ekkert alveg hættulaust en ekki þannig held ég. En hann var kominn  í brimið og ég komst að honum og náði honum um borð og svo komum við okkur bara út úr þessu og komust í land.“

Var hann þá orðinn mjög þrekaður?

„Já, hann var mjög þrekaður. Bæði kaldur og bara örmagna af þreytu þannig að það hefði kannski ekki mátt miklu muna.“

En hinir tveir? Þeir voru líka blautir og hraktir, ekki satt?

„Jújú, sérstaklega var annar þeirra þreyttur og kaldur en þeir náðu að bjarga sér í land og var svosem allt í lagi með þá.“

En þeir hefðu ekki getað bjargað þeim þriðja eða hvað?

„Nei, þeir vissu ekkert hvar hann var. Það var það langt á milli þeirra.“

En svo voru þeir allir teknir inn í hús til að hlýja þeim?

„Jájá, svo var bara her manns kominn hérna og það var hlúð sérstaklega að þessum eina hérna og komið hlýju í skrokkinn á honum.  Hann náði sér á svona tveimur-þremur tímum.“

Hvernig fóruð þið að því að hlýja þá upp?

„Það var bara nuddað og gefið heitt að drekka og svosem ekkert mikið annað en það,“ sagði Birgir Guðmundsson í Munaðarnesi.