Lög um birtingu brotin ítrekað

„Búð sem er með eftirlitsmyndavél má ekki setja þetta á netið, það er ekki hennar hlutverk. Hún má bara afhenda lögreglu upptökuna,“ segir Þórður Sveinsson, forstöðumaður lögfræðisviðs Persónuverndar. Stofnunin gaf í gær út tilkynningu á vef sínum til að árétta reglur um opinbera birtingu mynda úr eftirlitsmyndavélum.

„Það er verið að gera athugasemd við það að þeir sem vakta setji myndirnar sjálfir á netið,“ segir Þórður. Hann segist hafa orðið var við ítrekuð dæmi um þetta í fjölmiðlum.

Í flestum tilfellum er tilgangurinn með því að birta slíkt myndefni sá að hafa uppi á einhverjum sem grunaður er um refsivert athæfi. Samkvæmt persónuverndarlögum má hinn almenni borgari ekki afhenda neinum þetta efni öðrum en lögreglu, og þá þarf að eyða öðrum eintökum af efninu.

Þórður bendir á að lögreglu kunni þó að vera heimilt að birta myndirnar á netinu í leit að grunuðum samkvæmt þeim lögum sem hún starfar eftir. Persónuvernd hefur þó ekki tekið efnislega afstöðu til þessa.

Að sögn Þórðar hefur Persónuvernd í gegnum tíðina sent þeim bréf sem birt hafa myndefni sjálfir, minnt á reglurnar og í að minnsta kosti einu tilfelli úrskurðað að aðili hafi brotið gegn reglum um persónuvernd. Það var árið 2011 þegar öryggismyndband sem virtist sýna þjófnað var sett á Youtube en ekki afhent lögreglu.