Grikkirnir unnu í vítaspyrnukeppni | Liverpool komið í úrslitaleikinn

Manchester City og Olympiacos mættust í kvöld í B-riðli á Champions Cup sem haldið er í Bandaríkjunum þessa daganna. Leikurinn fór fram á TCF Bank Stadium í Minneapolis.

Stevan Jovetić kom City yfir á 35. mínútu með sínu fimmta marki á mótinu, en Dimitris Diamantakos jafnaði metin tveimur mínútum seinna.

Alexsandar Kolarov kom Englandsmeisturunum yfir á ný með marki úr vítaspyrnu á 53. mínútu, en Diamantakos jafnaði aftur á 65. mínútu.

Staðan var 2-2 að loknum venjulegum leiktíma og því þurfti að grípa til vítaspyrnukeppni þar sem grísku meistararnir höfðu betur.

Staðan var jöfn eftir fyrstu fimm spyrnurnar og eftir fyrstu umferð í bráðabana. Í annarri umferð klúðraði Micah Richards hins vegar sinni spyrnu á meðan Thanasis Papazoglou skoraði úr sinni og tryggði Grikkjunum sigur.

City, Olympiacos og Liverpool eru því öll með fimm stig í riðlinum, en ljóst er að Liverpool mun enda í toppsætinu þar sem liðið hefur betur í innbyrðisviðureignum bæði gegn Englands- og Grikklandsmeisturunum.

Liverpool mætir AC Milan í síðasta leik riðilsins seinna í kvöld. Leikurinn verður sýndur í beinni útsendingu á Stöð 2 Sport 2, en útsendingin hefst klukkan 22:40.