Bíða í klukkutíma eftir dirty burger og rifjum: „Það er allt að verða vitlaust“

„Það er allt að verða vitlaust,“ segir Agnar Sverrisson, eigandi staðarins Dirty Burgers & Ribs en staðurinn opnaði í dag og af því tilefni er allt á matseðlinum frítt fyrir gestina. Í bakgrunninum ómar tónlist. „Við erum með DJ hérna fyrir utan og það er svo gott veður. Allir eru bara hressir og kátir.“

Röðin er gríðarlega löng eins og sjá má á meðfylgjandi myndum og segir Agnar fólk bíða í um klukkustund eftir matnum. Staðurinn tekur aðeins 15 manns í sæti og stendur við bensínstöðina Orkuna á Miklubraut. „Það er hleypt inn í hollum,“ útskýrir Agnar. „Við opnuðum klukkan fjögur en fólk var mætt í röð rétt fyrir þrjú og það hefur verið röð hérna síðan. Mér sýnist hún ekkert vera að minnka.“ Starfsmennirnir hafa nú þegar á tæpum tveimur klukkustundum afgreitt um 700 skammta og verður opið til átta í kvöld eða á meðan birgðir endast. „Við erum með vel yfir þúsund skammta. Það getur verið að þetta sleppi til átta en við höfum ekki hugmynd um það.“

Því færri réttir, því betri matur

Matseðillinn er ekki flókinn á Dirty Burger & Ribs en aðeins tveir réttir eru í boði – hamborgarar og rif eins og nafn staðarins gefur ti kynna. „Hugsunin er aðallega sú að, þeim mun fleiri rétti sem staðir eru með á matseðli, þeim mun erfiðara er að ná honum góðum. Ef þú ert bara með tvo rétti á matseðli þá er bara skylda að maturinn sé góður.“ 

Agnari finnst á fólki að það sé nokkuð ánægt með matinn. „Það er auðveldara að gleðja fólk þegar allt er frítt náttúrulega,“ viðurkennir hann og hlær. „En við erum bjartsýn á að við séum með góða vöru og erum mjög ánægð með þetta.“ Enginn ætti að vera svikinn af matseld Agnars þar sem hann er eini íslenski kokkurinn sem hefur hlotið hefur Michelin-stjörnu viðurkenninguna sem er ein hæsta viðurkenning sem nokkur kokkur getur fengið. 

.