Tveir sendifulltrúar Rauða krossins á Íslandi taka þátt í baráttunni gegn ebólu í Síerra Leone

Randver Kári Randversson skrifar 19. júlí 2014 17:13

Magna Björk Ólafsdóttir og Elín Jónasdóttir sendifulltrúar Rauða krossins undirbúa brottför til Síerra Leone. Mynd/Rauði krossinn

Tveir heilbrigðisstarfsmenn Rauða krossins á Íslandi fara á næstu dögum til starfa í alþjóðlegu teymi sem vinnur gegn útbreiðslu ebólufaraldurs í Síerra Leone. Þegar hafa 843 tilfelli ebólu verið greind í þremur löndum Vestur-Afríku – Gíneu, Líberíu og Síerra Leone - og 315 dauðsföll staðfest.

Magna Björk Ólafsdóttir hjúkrunarfræðingur og Elín Jónasdóttir sálfræðingur munu starfa í Síerra Leone á vegum Alþjóða Rauða krossins, sem meðal annars einbeitir sér að því að fræða almenning um smitleiðir ebólu og leiðir til að koma í veg fyrir smit.Þetta kemur fram í tilkynningu frá Rauða krossinum.

Þær eru báðar með mikla reynslu af sendifulltrúastörfum fyrir Rauða krossinn víða um heim, nú síðast á Filippseyjum eftir fellibylinn Haiyan.

„Aðstæður eru án efa strembnar,“ segir Magna. „Fólk þekkir ekki ebólu þarna og margir tengja hana við illa anda og það gerir okkur erfiðara fyrir að fyrirbyggja smit.“

Magna mun starfa sem heilbrigðisfulltrúi Alþjóða Rauða krossins í landinu næstu þrjá mánuði.

Elín verður í einn mánuð í Kailahun héraði, þar sem hennar starf verður bæði að styðja við sjálfboðaliða og starfsmenn Rauða krossins á staðnum og vinna með Rauða krossinum í Síerra Leone við að finna leiðir til að ná til almennings með fræðslu um ebólu.

„Þarna er smithætta í umhverfinu og fólk á staðnum er hrætt og neikvætt,“ segir Elín. „Aðstæður eru óvenju erfiðar fyrir hjálparstarfsmenn þannig að hluti míns starfs verður að styðja þá.“

Hjálparstarfsmenn sem umgangast ebólusjúklinga nota sérstakan hlífðarbúnað. Öllum er ráðlagt að forðast snertingu, vera í lokuðum skóm og þvo sér oft og vel.

Rauði krossinn á Íslandi hefur verið í nánum tengslum við Rauða krossinn í Síerra Leone um árabil. Fjarskiptakerfi sem gerir Rauða krossinum kleift að senda fræðandi SMS skilaboð til fólks á ebólusvæðinu var komið upp nýlega með stuðningi Rauða krossins á Íslandi, sem fékk til þess framlag frá utanríkisráðuneytinu. SMS skilaboð hafa verið ákaft notuð til að fræða fólk undanfarnar vikur um hvernig það geti varist því að smitast.

Mest lesið

Fleiri fréttir