Opnar umræðu með ómandi kontrabassa

„Mér fannst tímabært að koma þessu á einhvern umræðugrundvöll í samfélaginu að það væri nú reistur minnisvarði um þennan besta son bæjarins,“ segir listamaðurinn Guðmundur Lúðvíksson sem setti nýverið fram hugmynd að minnisvarða í Reykjanesbæ fyrir tónlistarmanninn ástsæla Rúnar Júlíusson.

Hugmynd Guðmundar er eingöngu ætlað að hleypa lífi í umræðuna um minnisvarða fyrir söngvarann. Samfélagið þurfi að ákveða hvort það vilji almennt heiðra fólk sem hefur skarað fram úr. Rúnar lést seint á árinu 2008.

„Þá þarf að finna einhvern farveg fyrir framkvæmdina. Á að hafa samkeppni eða leita til einhverra ákveðinna listamanna?“ spyr Guðmundur. „Eða á að opna möguleika fyrir alla að senda hugmyndir inn?“ Skúlptúrinn sem hann hefur hannað er hans innlegg í þessa umræðu.

„Ég vildi bara setja fram mína hugmynd, það má hver sem er smíða skúlptúrinn.“

Guðmundi þykir mikilvægt að bærinn, eða aðilar hvaðanæva að á landinu, stígi upp og heiðri Rúnar, sem oft var kallaður Rúni Júl.

„Þarna er einstaklingur sem gaf þessu samfélagi gríðarlega mikið og var fyrirmynd margra, bæði hér og annars staðar.“